विराटनगर, ७ चैत – कोशी प्रदेश सभाको चालु छैटौँ अधिवेशन बिहीवार राति १२ बजेबाट अन्त गर्ने प्रदेश मन्त्रिपरिषद् बैठकले निर्णय गरेको छ ।
बिहीवार बिहान बसेको मन्त्रिपरिषद् बैठकले सो निर्णय गरेको कोशी प्रदेश सरकारका प्रवक्ता रेवतीरमण भण्डारीले जानकारी दिनुभयो । भण्डारीका अनुसार बैठकले कोशी प्रदेश जनस्वास्थ्य नियमावली २०८१ समेत स्वीकृति गर्ने निर्णय गरेको छ। त्यस्तै समस्याग्रस्त सहकारी संस्था वा सङ्घ व्यवस्थापन समितिको सदस्य सचिवमा चन्द्रबहादुर कार्कीलाई तोक्ने निर्णय गरिएको छ।
यस्तै समस्याग्रस्त सहकारी व्यवस्थापन समितिको कार्यालयका लागि १ करोड २८ लाख ६० हजार रकम बाँडफाँट गर्न स्वीकृत प्रदान गरिएको छ।
मन्त्रिपरिषद् बैठकले प्रदेश सरकारबाट स्थानीय तहलाई प्रदान गर्ने वित्तीय समानीकरण अनुदानका लागि अनुमानित सीमा १ अर्व ५० करोड तथा राजस्व बाँडफाँटको अनुमान सीमा १ अर्व १० करोड स्वीकृत गर्ने समेत निर्णय गरेको भण्डारीले बताउनभुयो । राजनीतिक तथा प्रशासन समितिबाट परिमार्जित आर्थिक मामिला तथा योजना मन्त्रालय र मातहतका कार्यालयको संगठन संरचना तथा दरबन्दी तेरिज- २०८१ पनि बैठकले स्वीकृत गरेको छ।
त्यस्तै बैठकले उच्च तथा जिल्ला अदालत सुदृढीकरणका लागि १ करोड ५० लाख बाँडफाँट गर्न स्वीकृत प्रदान गरेको समेत जानकारी मन्त्री भण्डारीले दिनुभयो ।
