पथरी । पथरीशनिश्चरेको रेडस्टार अङ्ग्रेजी आवासीय माध्यमिक स्कुलले अन्तर्राष्ट्रिय स्कुल (आइसए) अवार्ड पाएको छ ।
स्कुलले अन्तर्राष्ट्रिय अवार्डका लागि विद्यार्थीहरूसँग सम्बन्धित कामको विभिन्न प्रोजेक्टहरूको निर्माण गरेपछि अन्तर्राष्ट्रिय ब्रिटिस काउन्सिलले ‘२०२१–२०२४ ‘प्रथम’ फुल इन्टरनेशनल स्कुल अवार्ड’ प्रदान गरेको हो । यो सँगै रेडस्टार इन्टरनेशनल स्कूल अवार्ड (२०२१–२०२४) पाउने पूर्वी मोरङमै पहिलो स्कुल भएको छ ।
विद्यालयले पाठ्यक्रमसँग सम्बन्धित विभिन्न समयमा ८ वटा विषयको प्रोजेक्ट सम्पन्न गरेको थियो । नेपाल सरकार शिक्षा विभाग, पाठ्यक्रम विकास केन्द्र, शिक्षा तथा मानव संसाधन केन्द्रको संलग्नता र ब्रिटिस काउन्सिल नेपालको आयोजनामा एक समारोहका बीच भर्चुअल माध्यमबाट स्कुललाई माघ ११ गते अवार्ड प्रदान गरेको हो ।
अवार्डमा नेपाल सरकार मातहतको मानव संसाधन विकास परियोजनाका निर्देशक चूडामणि पौडेलको प्रमुख आतिथ्यमा सम्पन्न भर्चुअल कार्यक्रममा ब्रिटिस काउन्सिल नेपालका कन्ट्री डाइरेक्टर साइदा मेकडोगल र साउथ एसिया ब्रिटिस काउन्सिलकी रिजनल एजुकेशन एन्ड इङ्लिस एकेडेमी लिड एमिला सहभागीमा थिए । नेपालका ५३ वटा स्कुलले अवार्ड पाएका थिए ।
विद्यार्थीहरूले समुदाय र समुदायको निकटमा रहेका वन, वनस्पति, वन्यजन्तु र संस्कृतिको बारेमा अनुसन्धान तथा प्रयोगात्मक क्रियाकलापहरूको सिकाइ, स्थानीय साकेला (चण्डी) नाचको सांस्कृतिक महत्व र उपादेयतालाई अझ धेरै बढाउने उद्देश्यले साकेला नाचलाई पनि परियोजनामार्फत् सिकाइ, वातावरण स्वच्छता र शुद्धताका लागि स्थानीय क्षेत्रमा उपलब्ध हुने सखुवा वा अन्य कुनै पनि बिरुवाको पातको प्रयोग गरी वातावरण प्रदूषण नियन्त्रण गर्न सकिने र आफ्नो संस्कार–संस्कृति जोगाउन सकिने व्यावहारिक जोवन उपयोगी ज्ञान र सीप प्रदान गरिएको कुरा दुना, टपरी गाँस्नेलगायत ८ वटा प्रोजेक्ट गरेका थिए ।
ब्रिटिस काउन्सिलले पाठ्यक्रम विकास केन्द्र र शिक्षा विभागको प्रत्यक्ष निगरानीमा विद्यालयस्तरमा पठन–पाठन गराइने शिक्षण पद्दतिमा विश्वव्यापीकरण गर्दै एक देशको शिक्षण पद्दति अर्को देशको विद्यालयसँग जोड्दै विद्यालयमा परियोजनात्मक माध्यमबाट जीवनोपयोगी शिक्षालाई प्रोत्साहन गर्दै आएको छ ।
ब्रिटिस काउन्सिलले सन् २०१२ देखि देशभरिका उत्कृष्ट विद्यालयहरूलाई ३ वर्षका लागि आइएसए अवार्ड प्रदान गर्दै आएको छ । नेपाल सरकार पाठ्यक्रम विकास केन्द्र र शिक्षा तथा मानव संसाधन केन्द्रको संयुक्त सहयोग र ब्रिटिस काउन्सिल नेपालको आयोजनामा एक समारोहका बीच भर्चुअल माध्यममार्फत् नतिजा सार्वजनिक गरिएको रेडस्टार स्कुलका प्रबन्ध निर्देशक÷प्रिन्सिपल टेकनाथ तिम्सिनाले जानकारी दिए ।
रेडस्टारका विद्यार्थीहरूले पनि विश्वव्यापी रूपमा एउटा देशका विद्यार्थीहरूले आफ्नो कक्षाकोठाबाट अर्को देशका विद्यार्थीहरूसँग विभिन्न परियोजनात्मक क्रियाकलाप गरेर सिकेको सांस्कृतिक परम्परा तथा जीवनोपयोगी ज्ञान र सीपलाई विश्वका अन्य मुलुकहरूसित आदान–प्रदान गर्दै शिक्षा ग्रहण गरेका रेडस्टार स्कुलका प्रबन्ध निर्देशक/प्रिन्सिपल तिम्सिनाले बताए ।
विद्यालयले पाठ्यक्रमसँग सम्बन्धित प्रोजेक्ट निर्माण गर्दा भारत, पाकिस्तान लगायतका विद्यार्थीहरूसँगको संयुक्त परियोजना सञ्चालनसमेत गरिसकेका छौं ।
जसमा विद्यार्थीहरूले विदेशी विद्यालयका विद्यार्थीलाई अङ्ग्रेजी तथा नेपाली भाषाको माध्यमबाट विद्यार्थीहरूले आफ्नो सिकाइलाई अर्को अन्तर्राष्ट्रिय स्कुलका विद्यार्थीहरूसँग आदान–प्रदान गरेको रेडस्टार स्कुलका आइएसए संयोजक राजु तिमिल्सिनाले बताए । उनले विद्यालयमा नियमित रूपमा उत्कृष्ट अङ्कलाई आत्मसात गर्दै असल संस्कारसहितको जीवनोपयोगी शिक्षामा जोड दिँदै अवार्डको लागि प्रोजेक्टहरू अगाडि बढाएको बताए ।
गत वर्ष कक्षा १२ मा व्यवस्थापनतर्फ विनिता धिमाल प्रदेशमै उत्कृष्ट अङ्क ल्याउँदै पहिलो बनेकी थिइन् । स्कुलले १६ जना राष्ट्रियस्तरका खेलाडी उत्पादन गरिसकेको छ । २०६९ मा ११ कक्षा सुरु गरेको विद्यालयमा अहिले कक्षा ११ मा २ सय ८६ र १२ मा २ सय ८० जना छात्रछात्राहरू अध्ययनरत छन् । नर्सरीदेखि कक्षा १० सम्म ७ सय ५० जना छात्रछात्राले अध्ययन गरिरहेका छन् ।
५ वर्षअघि स्कुलका प्रबन्ध निर्देशक÷प्रिन्सिपल टेकनाथ तिम्सिना र वसन्त मादेनको टिमले विद्यालय सञ्चालनको जिम्मा लिएपछि छोटो समयमै रेडस्टार स्कुललाई शैक्षिक ‘हब’ को रूपमा विकास गर्दै लगेको दाबी गरेका छन् ।
