भद्रपुर, १८ चैत—नेपाल पत्रकार महासंघले पत्रकार र मिडिया हाउसहरुमाथि आक्रमण गरी क्षति पुर्याउने समुहलाई कडाभन्दा कडा कारबाहीको माग गरेको छ ।
राजावादी समुहले चैत १५ गते काठमाडौंमा आयोजना गरेको प्रदर्शनको रिपोर्टिङका लागि पुगेका पत्रकार सुरेश रजकको प्रदर्शनकारीले आगो लगाएको घरमा जलेर मृत्यु भएको थियो । त्यस्तै प्रदर्शनकारीको आक्रमणमा परी अनलाइनखवरका दिनेश गौतमको खुट्टा भाँचिएको छ । राजावादीहरुले ढुंगामुढा र आगजनी गर्दा कान्तिपुर टेलिभिजन र अन्नपूर्णपोस्ट्को कार्यालयमा क्षति पुगेको छ भने हिमालयन टेलिभिजनको गाडी फुटाइएको छ ।
आन्दोलन र प्रदर्शनका नाममा सञ्चारकर्मीको ज्यान लिइएको सो घटनामा संलग्नलाई कारबाहीको माग गर्दै नेपाल पत्रकार महासंघले प्रमुख जिल्ला अधिकारीमार्फत् सरकारको ध्यानाकर्षण गराएको हो ।
झापाली सञ्चारकर्मीले पनि आज प्रमुख जिल्ला अधिकारी गोपालकुमार अधिकारीमार्फत् सरकारले ज्ञापनपत्र वुझाएका हुन् । ज्ञापनपत्र वुझाउँदै पत्रकार महासंघ झापाका अध्यक्ष एकराज गिरीले पत्रकार हत्या र आक्रमणमा संलग्नलाई तत्काल पक्राउ गरी कारबाही नगरिए सरकारविरुद्ध पत्रकारहरु आन्दोलनमा उत्रन बाध्य हुने चेतावनी दिनुभयो ।
ज्ञापनपत्र वुझ्दै प्रजिअ अधिकारीले पत्रकारहरुका मागमा आफ्नो पनि ऐक्यवद्धता रहेको र सो ज्ञापनपत्र आजै गृहमन्त्रालय पठाउने प्रतिवद्धता जनाउनुभयो ।
