दमक, चैत १८ / दमक नगरपालिका वडा नम्बर ६ । यो वडा नगरको मुख्य बजार क्षेत्रमा पर्छ । यही क्षेत्रका महिलाहरुलाई आत्मनिर्भर बन्न भन्दै वडा कार्यालयले अर्गानिक धुप बनाउने तालिम उपलब्ध गराएको छ ।
वडामा रहेका विभिन्न २२ जना महिलाहरुलाई छनौट गरि ५ दिनसम्म अर्गानिक कपुर धुप बनाउने तालिम दिएको थियो । प्रशिक्षक खेम कुमारी ओलीले ५ दिनसम्म तालिम दिएर सहभागी सबैलाई धुप बाट्न जान्ने बनाएको आइतबार सम्पन्न भएको समापन कार्यक्रममा बताउनु भयो ।
तालिममा सहभागी भएका महिलाहरुले उत्पादन गरेको धुपले बजार नपाउला कि भन्ने चिन्ता र पनि गर्न नपर्ने । जसले जस्तो बनायो त्यहि अनुसारको मूल्यमा प्रशिक्षक ओलीले नै खरिद गरिदिने । यो भन्दा राम्रो अवसर यहाँ फेरि नआउने भन्दै तालीममा सहभागी अगुवा महिला गीता कुँवरले बताउनु भयो ।
महिलाहरुले घरको काम भ्याउँदै केही न केही आय आर्जनमा लाग्न सकुन् भनेर यो तालिम आयोजना गरिएको वडा सदस्य वीणा शाहले उल्लेख गर्नुभयो ।
महिलाहरुले सानो सानो कुरा र आवश्यकतामा पनि पुरुषहरुकै भर पर्नु पर्ने बाध्यताको अन्त्यकालागि नगरमा नगर स्तरीय र वडा स्तरीय बिभिन्न कार्यक्रमहरु चलिरहेका छन् । यसमा सहभागी भएर काममा लाग्दै आफुलाई आत्मनिर्भर बन्न नगरकी उप प्रमुख रेगिना भट्टराई प्रसाईले सुझाव दिनु भएको छ ।
कार्यक्रमको अध्यक्षता ग्रहण गर्नु भएका वडाध्यक्ष टेकबहादुर थापाले यस वडामा बसोबास गर्ने कोही पनि महिला तथा युवाहरु पनि बेरोजगार बस्न नपरोस् भनेर यस्ता सीपसँग सम्बन्धित कार्यक्रमहरु गरिरहेको बताउनु भयो । नागरिकको माग र चाहनामा आधारित तालिमहरु सञ्चालन गरिएकोले त्यसको उपयोगिताबाट लाभ लिन सबैलाई अनुरोध गर्नु भयो ।
वडा सदस्य कमल श्रेष्ठले सञ्चालन गर्नु भएको कार्यक्रममा तालिममा सहभागीहरुलाई प्रमाणपत्र समेत वितरण गरिएको थियो । सबैलाई घर घरमै बसेर उद्यम गर्न सक्नेगरिको तालिम दिइएकोले यसलाई समूहगत बनाएर व्यवसायिक बन्न चाहनेहरुलाई वडाले अन्य कुरामा समेत सहयोग गर्ने जनाइएको छ ।
