पथरी, चैत १८ – क्याम्पसको स्नातकोत्तर तहको परीक्षा उत्तीर्ण गर्दा गरिने दीक्षान्त समारोह विद्यालयको आधारभूत कक्षामा समेत लागू गर्न थालिएको छ ।
यस्तै भएको छ मोरङको पथरी शनिश्चरे २ को बुद्धचोकस्थित सिड्लिङ मन्टेश्वरी स्कुलमा । स्कुलले सोमबार ९ औं वार्षिकोत्सव तथा दीक्षान्त समारोह भव्यताका साथ सम्पन्न गरेको छ । कक्षागत रुपमा उत्तीर्ण भएका ससाना विद्यार्थीहरुलाई कालो टोपी लगाइदिएर दीक्षान्त कार्यक्रमका रुपमा विदाई समेत गरेको दृष्य अनौठो लाग्थ्यो ।
स्थानीय हरियाली सामुदायिक वनको सभाहलमा सम्पन्न कार्यक्रममा प्रमुख अतिथिका रुपमा पथरी शनिश्चरे नगरपालिकाका प्रमुख मोहनप्रसाद तुम्वापोले सिड्लिङले मन्टेश्वरी शिक्षण पद्धति अवलम्बन गर्दै बालबच्चाप्रतिको गरेको लगानी सबैभन्दा महत्वपूर्ण रहेको उल्लेख गर्नुभयो ।
तुम्वापोले शुभकामना मन्तव्यका क्रममा भन्नुभयो ‘यस विद्यालयले बालबच्चामाथिको लगानी भविष्यको निक्कै उपलब्धिमूलक र फलदायी हुने विश्वास छ ।’
मन्टेश्वरीका अध्यक्ष तथा प्रिन्सिपल विन्दु चेम्जोङ राईको अध्यक्षतामा सम्पन्न कार्यक्रममा विशिष्ट अतिथिको रुपमा वडा नम्बर २ का वडाध्यक्ष नैना राई, वडा सदस्यहरु खिलनाथ घिमिरे, चन्द्रकुमार राई, अम्विका लिम्बु, सीता दर्जी, वडा सचिव गोमा पौडेल र अभिभावकहरूको आतिथ्यता रहेको थियो ।
सो अवसरमा विभिन्न तहका विद्यार्थीहरुले गायन, नृत्य तथा अन्य सुन्दर सांगीतिक तथा सांस्कृतिक प्रस्तुतिहरु प्रस्तुत गरेका थिए ।
सो विद्यालयले मन्टेश्वरी शिक्षण पद्धति अवलम्बन गर्दै विगत ९ वर्षदेखि खेलाउँदै सिकाउने मन्टेश्वरी शिक्षण पद्धतिद्वारा प्रभावकारी रुपमा कक्षा १ सम्मको शिक्षा प्रदान गर्दै आइरहेको छ ।
