पाँचथर — फाल्गुनन्द गाउँपालिकाको जय नारायण आदर्श माध्यमिक विद्यालयमा ८५ लाख रुपैयाँ खर्चेर बनाएको छात्रावास भवन उद्घाटन गरेको २७ महिनासम्म संचालनमा आउन सकेको छैन ।
प्राविधिक विषय लिएर अध्ययन गर्ने छात्राहरूलाई आवासको सुविधा दिँदै पठनपाठन सहज गराउन २ वर्षअघि निर्माण कार्य सकिएको यो भवनमा भर्याङ, रेलिङ र शौचालयजस्ता अत्यावश्यक संरचना निर्माण नगरिएको भन्दै विद्यालयले स्वामित्व ग्रहण नगरेपछि भवन बेवारिस बनेको छ ।
प्रदेश सरकारको लगानीमा निर्माण भएको दुई तले भवनमा १२ कोठा छन् । भवन निर्माण गरिए पनि माथिल्लो तलामा जाने भर्याङ, बरन्डामा रेलिङसँगै शौचालय नहुँदा आधकल्चो संरचनाको स्वामित्व ग्रहण नगरेको प्रधानाध्यापक बिनोद अधिकारीले बताए ।
भवनको उद्घाटन २०७६ साल कात्तिक ७ गते प्रदेश १ का तत्कालीन आर्थिक मामिला तथा योजनामन्त्री इन्द्रबहादुर आङबोले गरेका थिए । उद्घाटन गरेको दुई वर्षसम्म भवनमा शौचालय, रेलिङ, भर्याङलगायत संरचना बनाइएको छैन । भवन निर्माण उपभोक्ता समितिमार्फत गराइएको थियो । गाउँपालिकाको उप-निर्वाचनमा मतदाता प्रभावित पार्न निर्माण नसकिँदै छात्राबास उद्घाटन गरिएको स्थानीयको आरोप छ ।
तत्कालीन नेकपाका नेता प्रेम रिजाललाई निर्माण उपभोक्ता समितिको अध्यक्ष बनाएर राजनीतिक आडभरोसामै भवन अधुरो छाडिएको स्थानीयको आरोप छ ।
निर्माण समितिका अध्यक्ष रिजाल भने त्यो बेला प्रदेश सरकारले उपलब्ध गराएको बजेटले नपुग्दा संरचना अधुरै छाडिएको दाबी गर्छन् । भवन अधुरो भए पनि उद्घाटन भएपछि छात्राबास भवन स्वतः विद्यालयको जिम्मामा गइसकेकाले बाँकी काम स्कुलले नै गर्नुपर्ने उनको अडान छ ।
गाउँपालिका अध्यक्ष बीरबहादुर कुरुम्वाङ पनि स्कुलले अन्यत्रबाटै स्रोत खोजेर भवनको काम पूरा गर्नुपर्ने बताउँछन् । छात्रावास सञ्चालनमा नआउँदा विद्यार्थीहरू टाढा-टाढाबाट धाएरै प्राविधिक विषयको अध्ययन गरिरहेका छन् ।
