एक लाखको सपना देखेर सुरु गरेको अक्षयकोषमा ५० लाख नाघ्यो

विर्तामोड, २५ जेठ । आइतवार विर्तामोडको सिद्धार्थ होटलबाट झापाली पत्रकार महिलाले एउटा बेजोडको खबर सार्वजनिक गरे । पूर्व राष्ट्रपति विद्यादेवी भण्डारीलाई साक्षी राखेर सुनाइएको त्यो खबर झट्ट सुन्दा आश्चर्यलाग्दोे पनि छ ।

संस्था खडा भएको चानचुन १२ वर्षमै नारी सञ्चारगृह झापाको अक्षयकोषमा ५० लाख जम्मा भइसकेको छ । आइतवार विर्तामोडमा आयोजित कार्यक्रममा संस्थाकी अध्यक्ष रेजिना गौतमले सगर्व यो घोषणा गर्नुभयो । कोषमा सहयोग गर्ने दाताहरु अझै थपिंदैछन् । त्यसैले यो कोष यतिमै रोकिंदैन भनेर प्रष्टैसँग भन्न सकिन्छ ।

अव यही कोषबाट समस्यामा परेका पत्रकार महिलाले राहत पाउनेछन् । मिडियाहाउसहरु वन्द भएर अफ्ठ्यारो झेल्नुपरेका पत्रकार महिलाले लेखनवृत्तिको माध्ययबाटै भए पनि साथ पाउनेछन् । अनि हरेक वर्ष दिइने पुरस्कारले पत्रकार महिलाको आत्मसम्मान पक्कै बढ्ने छ ।
सञ्चारगृहले एक लाख राशीको साधना पत्रकारिता पुरस्कार र २५ हजार राशीको नारी सञ्चार प्रोत्साहन पत्रकारिता पुरस्कार स्थापना गरेको छ । दुबै पुरस्कार हरेक दुई वर्षमा वितरण हुन्छ ।

२०६८ सालमा यो संस्था सुरु गर्दा पत्रकारितामा मुस्किलले १२÷ १४ जना महिला देखिन्थे । संस्थापक अध्यक्ष सावित्रा दाहाल सम्झनुहुन्छ— ‘त्यसताका झापामा पत्रकार महिलालाई कुनै अवसर थिएन । महासंघको नेतृत्व होस् या पत्रकारितासम्बन्धी पुरस्कारमा पत्रकार महिलाको भागै लाग्दैनथ्यो ।’

पक्कै पनि पेशागत संघ–संस्थाहरुमा पुरुषकै हालीमुहाली चल्ने समयले पत्रकार महिलामा संगठित हुनैपर्ने चेत आएको यसका संस्थापकहरु स्वीकार्छन् । सिनियर र नेता भनिने पत्रकारहरुबाटै किनारामा पारिएका महिला पत्रकारहरुको दृढ अठोटले जन्मिएको हो— नारी सञ्चारगृह । यसको जन्मसँगै पत्रकार महिलाले आफ्नै दरिलो संगठन पाएको महसुस गरेका छन् ।

अहिले समयले निकै कोल्टे फेरिसक्यो । नारी सञ्चारगृहमा अहिले ५० जना पत्रकार आवद्ध भइसकेका छन् । सबैजसो सञ्चारकर्ममा सक्रिय छन् । केहीले त राष्ट्रिय तथा अन्तर्राष्ट्रिय स्तरका मिडियाहाउसको समेत नेतृत्व गरिराखेका छन् । पत्रकार महिलाको यो सफलतामा कतै न कतै नारी सञ्चारगृहको योगदान पक्कै छ ।

संस्थाका पूर्व अध्यक्ष अम्बिका भण्डारी– ‘महिलालाई पत्रकारिता सिकाउन र पेशामा टिकाउनकै लागि पनि नारी सञ्चारगृह खडा गरिएको’ बताउनुहुन्छ । २०७४ देखि ७७ सम्मको कार्यकाल संस्थाको नेतृत्व गर्नुभएकी भण्डारीले यो कोषको जग राख्नुभएको थियो । कोषमा २५ लाख पु¥याउने अठोटसहित भण्डारी नेतृत्वले थालेको अभियानले १२ लाख जम्मा ग¥यो । त्यो लक्ष्य भने भीमा शिवाकोटी नेतृत्वले पूरा गरेको भण्डारी बताउनुहुन्छ ।

त्यसो संस्थापक अध्यक्ष दाहालले पनि एक लाख रुपैयाँको कोष खडा गर्ने बाचा गर्नुभएको थियो । ‘त्यस बेला स्थानीय तहहरुमा पनि अहिलेजस्तो वजेट थिएन, त्यही भएर सानो कोषको कल्पना गरियो’—दाहाल भन्नुहुन्छ ।

यति छोटो समयमै यति ठूलो रकमको अक्षयकोष कसरी सम्भव भयो त ? संस्थापक अध्यक्ष दाहालको भनाइमा ‘ नेतृत्व पारदर्शी भयो र संस्थाका सबै सदस्यमा एकता भयो भने जस्तै अफ्ठ्यारा काम पनि पूरा हुने रहेछ ।’