इनरुवा । बर्जु गाउँपालिकाको नवनिर्मित प्रशासनिक भवन उद्घाटन गरिएको छ । प्रदेश १ का आन्तरिक मामिला तथा कानून मन्त्री केदार कार्कीले उक्त भवनको उद्घाटन गरेका हुन् ।
गाउँपालिका अध्यक्ष रघुनन्दन चौधरी, उपाध्यक्ष सङ्गीताकुमारी रायका साथै वडाध्यक्षलगायतका जनप्रतिनिधिको उपस्थितिमा मन्त्री कार्कीले गाउँपालिकाको प्रशासनिक भवन उद्घाटन गरे । ९९ लाख ७१ हजार ९ सय ८ रुपैयाँ लागतमा निर्माण सम्पन्न एकतले पक्की भवनमा हलसहित ७ वटा कोठा रहेको बर्जु गाउँपालिकाका प्रमुख प्रशासकीय अधिकृत प्रमोदकुमार चौधरीले जानकारी दिए ।
प्रमुख प्रशासकीय अधिकृत चौधरीका अनुसार नवनिर्मित भवन उत्तरा कन्स्ट्रक्सन एण्ड सप्लायर्स कटहरी मोरङले निर्माण गरेको हो । भवन उद्घाटन कार्यक्रममा गाउँपालिकाको लागि जग्गा उपलब्ध गराउने राधेश्याम चौधरी, रोमी शर्मा र विनादेवी यादवलगायतलाई सम्मान गरिएको चौधरीले बताए ।
दुई तले भवन निर्माणको योजना रहे पनि तत्कालको लागि एक तले संरचना निर्माण गरिएको गाउँपालिकाले जनाएको छ । भवन उद्घाटनसँगै कामकाजको तयारी थालिएकाले सेवा प्रवाह सहज र सरल हुने अध्यक्ष रघुनन्दन चौधरीले बताए । अध्यक्ष चौधरीले यसअघि पुरानो र साँघुरो भवनका कोठाबाट सेवा प्रवाह हुँदै आएकोमा नयाँ भवनबाट दिइने सेवाले सर्वसाधारणमा थप सहजता हुने बताए ।
यसैबीच भवनसँगै बर्जु गाउँपालिकाको कार्यालयले ९ औं गाउँसभाको समेत उद्घाटन गरेको छ । प्रशासकीय अधिकृत प्रमोदकुमार चौधरीले गाउँसभा दुई दिन चल्ने बताए । अधिकृत चौधरीले गाउँसभामा विगतको समीक्षा र पालिकाभित्र आउँदा दिनमा सञ्चालनमा ल्याइने योजना तथा कार्यक्रमका सम्बन्धमा नीति निर्माण गरिने बताए ।
गाउँसभा तथा नवनिर्मित भवन उद्घाटन पूर्व गाउँपालिका हातामा रक्तदान कार्यक्रमको आयोजना गरिएको थियो । लायन्स क्लब अफ हेल्थ प्रोफेसनल विराटनगरले आयोजना गरेको कार्यक्रममा ३३ जनाले रक्तदान गरेका थिए । क्लबका अध्यक्षसमेत रहेका बर्जुका प्रमुख प्रशासकीय अधिकृत चौधरीको पहलमा गाउँपालिकामा रक्तदान कार्यक्रमको आयोजना गरिएको थियो ।
