पथरी, २६ जेठ / जब निर्णायकहरुनै गाउँदै आइडलको स्टेजमा प्रवेश गर्नुभयो, तब माहोल तात्यो । अनि खचाखच दर्शक श्रोताहरु स्थानीयस्तरमा राष्ट्रियस्तरका कलाकारहरु सामेल एउटा प्रभावकारी कार्यक्रमको स्वाद लिँदै गीतसंगीतमा रमाए ।
सृजना क्षेत्रको गतिविधिमा सक्रिय उत्तरपूर्वी मोरङको पथरी शनिश्चरेमा पहिलो पटक सञ्चालित नगरस्तरीय सिङगिङ तथा डान्सिङ आइडल प्रतिष्पर्धाको उपाधिका लागि आयोजित फाइनल प्रतिष्पर्धाको दृष्य थियो त्यो । जहाँ पूर्वको शान बनेको ‘जता हेरेपनि हजूर पूर्वै रमाइलो’ बोलको दोहोरी गीतबाट स्थापित गौरव दर्पण र सृष्टि हिङमाङ यही गीतमार्फत दर्शक श्रोता समक्ष प्रस्तुत हुनुभयो । अर्का निर्णायक नन्दु गुरुङ पनि जोडदार प्रस्तुतिका साथ उसैगरी मञ्चमा प्रवेश गर्नुभयो ।
आइडल घोषणासँगै पथरी शनिश्चरेको गौरवको दर्पणका रुपमा रहनु भएका गौरवलाई नगद २५ हजार, मुहारचित्र, दोसल्ला र सम्मानपत्रले नगर श्रष्टा सम्मानका रुपमा सम्मानित गरियो ।
त्यसपछि उहाँले आइडल हुने गायकलाई आफ्नोतर्फबाट एउटा गीत निःशुल्क रेकर्डिङ गरिदिने घोषणा गर्दा गायनको उपाधि हाँसिल गर्नुभएका राज लोहारमा झनै खुसी छायो ।
वडा नम्बर २ का राजले उपाधिमाथि राज गरिरहँदा ४ नम्बर वडाका अभिषेक मेयाङ्बो फस्ट रनरअप र वडा नम्बर २ की तुलसा थापा सेकेन्ड रनरअप भएर कडा प्रतिष्पर्धाबीच दर्विलो उपस्थिति जनाउनु भयो । अवन्तिका बस्नेतले पब्लिक च्वाइस अवार्ड प्राप्त गर्नुभयो ।
नगरपालिकाको उपसमितिका रुपमा रहेको कला साहित्य प्रवद्र्धन समितिको आयोजनामा सञ्चालित गायन र नृत्यको आइडल प्रतिष्पर्धामा दुबै विधाका उत्कृष्ठ १०/१० जनाको प्रस्तुतिबीच आइडल छनोट गरिएको थियो । नृत्यतर्फ, वडा नम्बर ९ की गरिमा मगरले उपाधि हात पार्नुभयो । फस्ट रनरअपमा वडा नम्बर १० की सुजता घिसिङ र सेकेन्ड रनरअपमा सोही वडाका वितेस राईले आफ्नो स्थान बनाउनु भयो । सुजता र वितेस सो नगरमा रहेको भुटानी शरणार्थी शिविरका नवप्रतिभा हुनुहुन्छ । पब्लिक च्वाइस अवार्डबाट कृष्टिना तामाङ पुरस्कृत बन्नु भयो । दुबै विधाका विजेता, फस्ट रनरअप र सेकेन्ड रनरअप हुनेलाई क्रमशः नगद ४० हजार, २० हजार र १० हजार तथा मेडल र प्रमाणपत्र प्रदान गरिएको थियो ।
यसखाले प्रतियोगिताले नगरभित्र लुकेर रहेका प्रतिभा उजागर गरेको नगर प्रमुख मोहनप्रसाद तुम्बापोले धारणा राख्नुभयो । ‘सबैले मिलेर यसखाले कार्यक्रम सफल बनाउनु भयो । यसले लुकेर रहेका प्रतिभा उजागर गर्ने काम गर्यो । नगरपालिका यसखाले गतिविधि सञ्चालनमा अग्रसर छ ।’– उहाँले भन्नुभयो ।
पहिलो अडिसनबाट हसन्दह र पथरीमा गरी नृत्यमा ११४ जना र गायनमा १०२ जनाले भाग लिएका थिए । जसमा उत्कृष्ठ २० मात्र नभएर उत्कृष्ठ १० मा समेत दलित समुदायका नवप्रतिभाको संख्या उल्लेखीय थियो । उत्कृष्ठ १० मध्ये गायनमा ५ जना र नृत्यमा २ जना दलित समुदायको प्रतिनिधित्वले सो समुदाय सृजना क्षेत्रमा अग्रसर रहेको प्रष्टिन्थ्यो ।
कला साहित्य प्रवद्र्धन समिति सदस्य एवम् आइडलका नृत्य संयोजक रामबहादुर विश्वकर्मा लुकेर बसेका प्रतिभाको पहिचान हुन सकेको ठहर गर्नुहुन्छ । भन्नुहुन्छ ‘यो कार्यक्रमले प्रतिभाको पहिचान भएको र नगरलाई सृजना क्षेत्रबाट बाहिर चिनाउने काम समेत भएको छ ।’
२०७५ मा नगरपालिकाको उपसमितिका रुपमा गठित समितिले साहित्य र कलाका गतिविधि वर्षेनी सञ्चालन गर्दै आएको छ ।
