दमक, ४ असार। फलफूल खानु स्वास्थ्यका लागि लाभदायी मानिन्छ । अझ मौसम अनुसारको फलफूलबाट त झन् हामीलाई आवश्यक पोषक तत्व प्राप्त हुन्छ । तर प्राकृतिक रुपमा नपाकेका फलफूल खाँदा त्यसले स्वास्थ्यमा विभिन्न किसिमका नकारात्मक असर पार्दछ । अहिले फलफूलको राजा मानिने आँपको सिजन हो । बजारभरि हेर्दा पहेँलो, हेर्दै रहर लाग्दो अनि खाउँखाउँ लाग्ने खालको आँपहरु प्रशस्त देख्न सकिन्छ । तर, के ती आँप प्राकृतिक रुपमै पाकेका हुन् त ?
अहिले आँपको सिजन छ । दमकमा पनि बजारभरि नै आँप देखिन्छ । तर के ति आँपहरु विषादीमुक्त छन् त ? दमकका बिभिन्न स्थानमा बेच्न राखिएका आँपहरु कुनै भारतबाट निर्यात भएका हुन, कुनै नेपाल भित्रैका अरु ठाउँबाट निर्यात भएका हुन् त कुनै स्थानीयले आफै उत्पादन गरेर आफै बेच्न ल्याएका हुन् । फलफूल पसलहरुमा आँप किन्न उपभोक्ताहरुको भिड देखिन्छ । बजारमा विषादीयुक्त आँपहरु आएका छन् भन्ने सुनेको तर कुन आँप खान योग्य छन्, कुन हानिकारक छन् भन्ने छुट्याउन नसकेको उपभोक्ताहरुको गुनाशो छ ।
नगरपालिकाले हरेक २—३ दिनमा बजार अनुगमन गर्ने गरेको र आफ्नो पसलमा यति बेलाको आँप नेपालभित्रकै रहेको बताउनुहुन्छ भट्टराई फलफूल पसलका फलफूल व्यवसायी शिव भट्टराई ।
केही दिनअघि सिजनभन्दा अघिनै अप्राकृतिक रुपमा विषादी प्रयोग गरि पकाएका आँप निर्यात भएको र त्यही क्रासले गर्दा अहिले सिजनको प्राकृतिक रुपमा पाकेको आँपलाई लिएर पनि उपभोक्तामा क्रास र शका फैलिएको हुन सक्ने भनाइ छ दमकका फलफूल व्यवसायी हेमराज अधिकारीको ।
बजारमा कस्ता प्रकृतीका आपहरु बिक्री भईरहेका छन् त भन्ने बिषयमा उपभोक्तामा अन्योल छाईरहेका बेला अनुगमनको जिम्मा पाएको निकायचाहिँ के गरेर बसिरहेको छ त ?
बजारमा बिभिन्न प्रकृतीका आपहरु छ्याप्छ्याप्ती छन् । यत्रतत्र अहिले आँप बेच्न राखिएको पाईन्छ । तर, उपभोक्ताले बिषादीरहित आँप हो या होईन भन्ने आफै छुट्याउन सक्ने आधारपनि छैन । त्यसैले अनुमगनकारी निकायले उपभोक्ताको स्वास्थ्यमा खेलबाड भएको छ कि भनेर बजार अनुमगनलाई मौसमी भन्दापनि नियमित बनाउन आवश्यक देखिन्छ ।
