पथरी, ३१ साउन / उत्तरपूर्वी मोरङको पथरी शनिश्चरे सृजना क्षेत्रमा अगाडि छ । जहाँ साहित्य र कलाका विभिन्न गतिविधिको सक्रियताको इतिहासलाई समेत स्मरण गर्दै नयाँ पुस्तामा सृजना जागरणको सन्देश छर्ने काम भइरहेको छ । जसमध्येको एक संस्था ‘शव्द थिएटर’ले नगरमा रंगमञ्चलाई विस्तार गर्दै ‘थिएटर हब’को रुपमा विकास गर्ने प्रयत्न गरिरहेको छ । यस अवस्थामा सोही अभियानको साथ समर्थनसहितको कार्यक्रमका रुपमा पछिल्लो पटक ‘चरणदास चोर’ नाटकको प्रदर्शन प्रारम्भ भएको छ ।
वडा नम्बर १ को पथरी बजारस्थित हरियाली सामुदायिक वनको हलमा शुक्रबार एक कार्यक्रमकाबीच पथरी शनिश्चरे नगर प्रमुख मोहनप्रसाद तुम्बापोले नाट्य अभियानको प्रारम्भका क्रममा नगरलाई सृजना क्षेत्रमा धनी रहेको चर्चा गर्दै सृजना प्रवद्र्धन नगरपालिकाले सधैं साथसहयोग प्रदान गर्दै जाने बताउनु भयो ।
थिएटर अध्यक्ष अशोककुमार राईले नगरमा नाट्य क्षेत्रको विस्तारका लागि नाट्यशाला आवश्यक रहेको प्रसंग उठाउँदै नाट्यशाला निर्माणमा पालिकासहित सबैको साथसहयोग पुर्याउन अनुरोध गर्नुभयो । प्रथम शो का रुपमा संघ संस्थाका प्रमुखहरुसँग रायसुझावसहित प्रिमियर शो सञ्चालन गरी १५ दिने नाटक प्रदर्शन अभियानको सुभारम्भ गरिएको हो । शनिबार (आज) नाट्यकर्मीहरुसँग शो सञ्चालन हुनेछ । आइतबारबाट भनें ( भदौ २ बाहेक) प्रत्येक दिन बिहान ७ः३० बजे, ११ बजे र बेलुका ५ः१५ बजे शो सञ्चालन हुनेछ । जसको टिकट दर ५ सय, ३ सय र विद्यार्थीका लागि १ सय ५० निर्धारण गरिएको छ । एउटा चोरी गरिहिड्ने मान्छे कसरी रानीको प्रियपात्रसम्म बन्न पुग्छ भन्ने विषयलाई रमाईलो गरी नाटकमा प्रस्तुत गरेको छ । चोर भएपनि सत्य बोल्ने मान्छे सत्य बोल्दा मारिनु परेको गहिरो भाव नाटकमा प्रकट छ । त्यसैभित्र राजनीतिक र सामाजिक मनोदशालाई पनि उजागर गरिएको छ ।
प्रिमियर शो हेरिसकेपछि स्थानीयले नाट्य प्रस्तुतिप्रति खुलेर प्रसंशा गरेका छन् । पञ्चायत नमुना मावि व्यवस्थापन समिति अध्यक्ष युवराज बास्कोटाले मसिनो गरी नाटकको समीक्षा गर्दै सृजनशील कलात्मकता प्रस्तुत भएको उल्लेख गर्नुभयो । ‘शिक्षा, चेतना वा भावनात्मक अर्थका साँच्चिकै चाखलाग्दो र घतलाग्दो अनुभूति प्रस्तुत भयो । राज्य व्यवस्था र राजनीतिक चरित्रप्रति निकै तिखो व्यंग्य प्रहार भएको पाइयो ।’ उहाँले भन्नुभयो ।
नाटकमार्फत नगरका विद्यालय तथा क्याम्पसका नवयुवा पुस्तालाई लक्षित गरेर सृजनाको माहोल खडागर्ने ध्याउन्तेमा छ ‘शव्द थिएटर’ । कला सस्तो मनोरञ्जनको साधन नभएको कुरा बुझाउँदै कलाको सम्मानका लागि टिकटमा नाटक देखाउने क्रमको यो दोस्रो नाट्य अभियान रहेको यसका निर्देशक जीवन बरालले अर्थ्याउनु भयो । ‘कला र कलाकारको सम्मानका लागि अनि नाट्यक्षेत्रलाई व्यवसायिक बनाउने हेतुले टिकटमा नाटक देखाउने र नगरका नवयुवा पुस्तामा सृजनाको विकास गराउने उद्देश्यमा हामी लागिरहेका छौं ।’– बरालले भन्नुभयो ।
हुनत, पथरी शनिश्चरेमा ०५० सालको सुरुवातताका केही नाटकहरु टिकटमा समेत देखाइएका थिए । त्यो बेलाको परम्परागत शैली र प्रविधिबिनाको जबरजस्तीजस्तो प्रयासको साक्षी रहनु भएका नाट्यकर्मी अशोक साम्पाङ नाटकको नयाँ प्रविधि र शैलीसंग जोडिएर नाट्ययात्रामा सामेल हुनुहुन्छ । ‘अनि देउराली रुन्छ’ नाटकबाट व्यवसायिक नाट्यात्रामा रहनु भएका साम्पाङ थिएटरलाई संस्थागत रुपमा दर्बिलो बनाउँदै नगरलाई ‘थिएटर हब’ निर्माणको योजनाको अगुवाई समेत गर्दै आउनु भएको छ ।
नाटकमा मोरङ र झापाका पुरानादेखि नाटक सिक्न रुचि राख्ने नवयुवा पुस्ताको समीश्रण रहेको छ । नाटकमा अशोक साम्पाङ, सुमन कुईकेल बराल, प्रेम खतिवडा, पुष्प राई, नविन रिजाल, सन्तोष छत्र राई, करुणा तिम्सिना, भूमिका बस्नेत, प्रसुना तिम्सिना, गृष्मा लिम्बू, अतिसर श्रेष्ठसहितको अभिनय देख्न पाइन्छ ।
भारतका हविव तन्वीरको लेखन रहेको ‘चरणदास चोर’ नाटकलाई नेपालका रंगकर्मी आसान्त शर्मा र राजन खतिवडाले नेपाली रुपान्तरण गर्नुभएको हो ।
