दमक, ३१ भदौ । आ–आफ्ना सवारी साधन तथा कलकारखानामा प्रयोग हुने उपकरण, औजारलगायतका सामाग्रीहरुको पूजा गरी प्रत्येक बर्ष असोज १ गते विश्वकर्मा पूजा मनाउने गरिन्छ । बिश्वकर्माको मन्दिरका साथै फोटोमा पूजा गरेर पनि यो पर्व मनाउने गरिएको छ । विश्वकर्मा पुजाका लागी पुजा सामाग्री, रिविन, विश्वकर्मा भग्वानको फोटो साथै विभिन्न परिकारका मिठाईहरुको अत्याधीक बिक्री हुने कारणले गर्दा विश्वकर्मा पुजा भन्दा अघिल्लो दिन र विश्वकर्मा पुजा कै दिउँसोको समयसम्म यस किसिमका सामाग्री बेच्ने व्यापारीहरुको लागी एउटा राम्रो अवसरको रुपमा पनि लिन सकिन्छ ।
भर्खरै भएको जेनजीको आन्दोलनको त्रासले कर्फु हटेर बजार सञ्चालन गर्न अनुमती आईसक्दा पनि बजार पूर्ण रुपमा पहिलाको जस्तो हुन सकेको थिएन । तर, विस्वकर्मा पुजाको अवसरमा भने दमक बजारको दृश्य भिन्नै थियो । दमकको बजार भरी विभिन्न टेन्ट टाँगी विभिन्न रंगका रिबनहरु झुन्डाईएको थियो । ठाँउ ठाँउमा विभिन्न परिकारका मिठाईहरु राखिएको थियो ।
दमकको आकाशे पुलको नजिकै टेन्ट टागी मिठाईका परिकारहरुको स्टल राखेर बस्नुभएका बिट्टु स्वीट्स हाउसका सञ्चालक विश्वनाथ साह अरु बेला विश्वकर्मा पुजामा निकै राम्रो व्यापार हुने गरेको तर यो वर्ष भने भर्खरै भएको आन्दोलनले गर्दा यसरी स्टल लगाएर सामान बेच्न पन अलिक डर लागेको बताउनुहुन्छ ।
अरु समयमा व्यापार गर्न पसल नरहेको तर, लक्ष्मी पुजा , होली र विश्वकर्मा पुजा जस्ता अवसर पारी स्टल लगाई व्यापार गर्दै आउनुभएको छ दमकका राजेश कुमार तारकले । उहाँको स्टलमासवारी साधन सजाउन चाहिने सामाग्री र पुजा गर्न चाहिने सामाग्रीहरु पाईन्छ । तर, यो वर्ष भने आन्दोलनले व्यापारमा प्रभाव पारेको र सोचे जस्तो व्यापार गर्ननसकेको उहाँको पनि भनाई छ ।
भर्खरै भएको जेनजी आन्दोलनले व्यापारमा पनि प्रत्यक्ष असर पारेको छ । जेन जी जी आन्दोलनका क्रममा केहि अपराधीक मानसीकता भएकाहरुले बिभिन्न व्यापारीक प्रतिष्ठान, व्यक्तिका घर तथा सार्वजनिक सम्पत्तीमा आगजानी तथा तोफोड गरिदिएका कारण उनीहरुमा यस्तो त्रास बढेको हो ।
