दमक, ११ असोज / दुःख र संघर्षले मानिसलाई सृजनशील बनाउँछ भन्ने भनाई उहाँमा लागू हुन्छ । अर्थात घरमा श्रीमान विरामी परेपछि परिवारको आर्थिक व्यवस्थापनमा थपिएको जिम्मेवारीले रोजगारीका लागि इजरायल पुग्नु भएकी मुना बराल सिग्देललाई सृजनशील बनायो ।
मोरङको उर्लाबारी ७ की सिग्देल ०६३ सालमा रोजगारीका लागि इजरायल गएर १२ वर्ष श्रम खर्चिनु मात्र भएन घरदेशको चिन्तामा परदेशको भोगाईले उहाँ मुना आत्रेयका रुपमा स्थापित गजलकार बन्न सक्नु भयो ।
देवीप्रसाद बराल र हिमादेवी बरालको सन्तानका रुपमा भारतको असममा जन्मिनु भएकी उहाँ विशेषगरी गजल, कविता र मुक्तक विधामा कलम चलाउनु हुन्छ । श्रीमान विष्णु सिग्देल, छोरा विजय र छोरी विकिताको प्रेमिल वातावरणमा हौसला पाएर लेखनयात्रामा समाहित उहाँ देश र विदेशमा समेत सम्मानित भएर सृजनायात्रामा आफूलाई उर्जाशील बनाइरहनु भएको छ ।
डियरकल्याण साहित्य प्रतिष्ठान सचिव, वैदिक दिब्यधाम नेपाल उर्लाबारी कोषाध्यक्ष तथा नेपाली साहित्य समाज उर्लाबारीमा आवद्ध रहेर सृजनशील र आध्यात्मक गतिविधिमा सक्रिय हुनुहुन्छ । उहाँको पहिलो कृतिका रुपमा गजल संग्रह ‘तृप्ति’ प्रकाशनको संघारमा छ । उहाँसँग उज्यालो खबरको ‘अनुशीलन’ कार्यक्रमको ४५ औं श्रृंखलामा गरिएको भलाकुसारी र सृजना प्रस्तुति भिडिओमा हेरौं :
