पथरी, २७ असोज / मोरङको पथरीशनिश्चरे नगरपालिका १, मा अवस्थित मनकामना सामुदायिक वन उपभोक्ता समूहको १७ औं साधारणसभा सोमबार सम्पन्न भएको छ ।
कार्यक्रमका प्रमुख अतिथि पथरीशनिश्चरे नगरपालिका १ नं. वडा अध्यक्ष भीमकुमार राईले मनकामना सामुदायिक वनबारे अमेरिकामा समेत चर्चा हुने गरेको प्रसंग उल्लेख गर्नुभयो । अमेरिकामा रहेका आफ्नो साथीले पथरीको मनाकामना सामुदायिक वनमा रहेको कटुसे र ट्रिहाउस बारे चर्चा गर्ने गरेको बताउनुभयो ।
कार्यक्रममा सामुदायिक वन उपभोक्ता महासंघका प्रदेश समिति सदस्य अग्नी पौडेलले देशमा विषम परिस्थिति भएको कारण कानून संशोधन नभएपनि सामुदायिक वनमा लाग्ने कर घट्नुपर्ने बताउनुभयो । खुल्ला सत्रमा समूहका अध्यक्ष उदयकुमार राई (दिनेश)ले प्रगति प्रतिवेदन पेश गर्नुभएको थियो ।
कार्यक्रममा सामुदायिक वन उपभोक्ता महासंघ मोरङ जिल्ला अध्यक्ष मदन पोखरेल, पथरीशनिश्चरे नगर समिति अध्यक्ष मैना आचार्य, डिभिजन वन कार्यालय पथरीका प्रमुख त्रिभुवन साह, सुनाखरी मावि व्यवस्थापन समितिका अध्यक्ष प्रदीपकुमार राई लगायतले शुभकामना मन्तव्य व्यक्त गर्नु भएको थियो ।
खुला सत्रमा अध्यक्ष उदयकुमार राई, सचिव मञ्जु लिम्बू, कोषाध्यक्ष शान्तमाया शेर्पा, लेखा समिति संयोजक यामबहादुर सुब्बाद्वारा प्रतिवेदन पेस भएको थियो । कार्यक्रममा एकल महिला र जेष्ठ उपभोक्ताहरुलाई नगद, टीका र माला लगाएर सम्मान गरिएको थियो ।
