अर्जुनधारा , १२ कात्तिक । झापाको अर्जुनधारा नगरपालिकाबाट प्रहरीले अवैध सुर्तीसहित दुई जनालाई नियन्त्रणमा लिएको छ। उनीहरूको साथबाट एक थान अटो र स्कुटर समेत बरामद गरिएको छ। बुधबार साँझ करिब ७ः३० बजे अर्जुनधारा–११ लक्ष्मीधाप स्थित भित्री सडक खण्डमा धुलाबारीबाट माता मन्दिरतर्फ जाँदै गरेको मे १ ह ४९१५ नम्बरको अटोलाई अस्थायी प्रहरी पोष्ट बसपार्कको गस्ती टोलीले जाँच गरेको थियो। प्रहरी सहायक निरीक्षक कृष्णप्रसाद मण्डलको नेतृत्वमा खटिएको टोलीले चेकजाँच गर्दा अटोबाट ४ बोरा अवैध मडुवा सुर्ती फेला पारेको हो।
प्रहरीले अवैध सुर्ती ओसारपसारमा संलग्न अटो चालक बिर्तामोड–५ फुलबारीका ३६ वर्षीय टिकाराम राई र सुर्ती धनी पाँचथर फिदिम–४ का ३५ वर्षीय धनबहादुर थापालाई नियन्त्रणमा लिएको छ। थापाले प्रयोग गरेको अनटेस्ट ईभी स्कुटी, अटो र सुर्तीसहित दुवै जनालाई थप अनुसन्धान तथा कानुनी कारबाहीका लागि इलाका प्रहरी कार्यालय बिर्तामोडमा राखिएको प्रहरीले जनाएको छ।
