दमक, १७ कार्तिक । गत कार्तिक ९ गते दमक–८ निवासी रबिन खड्काको घरमा आगलागी हुँदा उनको ३० वर्ष पुरानो घर पूर्णरूपमा नष्ट भएको छ। करिब तीन पुस्तादेखि बसोबास गर्दै आएको घर स्थानीय र परिवारको प्रयास पछि पनि बचाउन सकिएन । घर संगै लाखौ मूल्यको क्षति भयो । आगलागी नियन्त्रणका लागि प्रयोजन हुने बारुणयन्त्र दमक नगरपालिकामा नभएकै कारण समयमै नियन्त्रण गर्न नसकिएको पीडित खड्काको गुनासो छ ।
दमक नगरपालिकाको बारुणयन्त्र गत भदौ २३ र २४ गतेको आन्दोलनका क्रममा जलेर नष्ट भएको हो। त्यसयता उक्त दमकल सञ्चालनमा आएको छैन। आगलागीपछि उर्लाबारी नगरपालिकाका र कमल गाउँपालिकाबाट आएका दमकलको सहयोगमा साँझ ५ः५० बजे आगो नियन्त्रणमा लिइएको थियो। तर बारुणयन्त्र अभावका कारण पछिल्ला वर्षहरूमा दमक र आसपासका क्षेत्रमा आगलागी नियन्त्रणमा कठिनाइ भइरहेको छ। स्थानीयवासीले पनि यसको अभाव गम्भीर रूपमा महसुस गरिरहेका छन्। ।
दमक–४ का स्थानीय रबिकुमार राई दमकल नहुदा समस्यामा परेको बताउनुहुन्छ । कहि कतै आगलागि भएमा ठूलो क्षति ब्यहोर्नूपर्ने भन्दै नगरपालिकाले तत्काल सञ्चानलन गर्नुपर्ने उहाँको धारणा छ ।
पूर्व कार्यबाहक नगरप्रमुख समेत रहनुभएका हिमालय दाहालका अनुसार दमकल अत्यावश्यक सवारी साधन भएकाले यसको पुनः सञ्चालन तत्काल गर्नुपर्ने आवश्यकता औल्याउनुहुन्छ । आगलागीको समय नजिकिदै गरेकाले यसको सञ्चालनमा ढिलाई गर्न नहुने उहाको तर्क छ ।
यता दमक नगरपालिकाले भने आन्दोलनका क्रममा भएका क्षतिको पुर्न निर्माणका बिषयमा आन्तरिक रुपमा अघि बढाईएको बताएको छ । केहि दिन अघि उज्यालो खबरसंगको कुराकानीका क्रममा उहाँले बोर्ड बैठक मार्फत छलफल मार्फत अघि बढ्ने बताउनुभयो ।
हाल दमकमा आगलागीका घटनामा छिमेकी पालिकाका दमकलको भर पर्नुपर्ने अवस्था छ। तर ती पनि समयमा नपुग्दा करोडौंको धनमाल नष्ट हुने र परिवारहरू विस्थापित हुने अवस्था देखिएको छ । यसतर्फ बेलैमा ध्यान दिन जरुरी देखिन्छ ।
