दमक, १९ मंसिर । डीएसपी किशोर लम्सालले इलाका प्रहरी कार्यालय दमकको कमाण्ड सम्हालेको एक महिना पूरा भएको छैन तर महिना दिन नबित्दै उहाँले ६ पटक स्वीप अपरेसन गरिसकनु भएको छ।
त्यसक्रममा करिव ६० जना पक्राउ परि सकेका छन् । जेनजी आन्दोलनमा इलाका प्रहरी कार्यालय दमकमा तोडफोड र आगजनी गर्नेदेखि लिएर होटलमा यौन व्यवसाय संचालन गर्ने , लागूऔषधका कारोबारी र प्रयोगकर्ता , मादक पदार्थ सेवन गरेर होहल्ला गर्नेसम्मका व्यक्तिलाई नियन्त्रणमा लिएर उहाँले कार्वाही गर्नु भएको छ। स्वीप अपरेसनकै क्रममा ठूलो आवाजका साथ ध्वनि प्रदूषण गर्ने ५० वटा मोडिफाई मोटरसाइकल नियन्त्रणमा लिनु भएको छ।
स्वीप अपरेसनका क्रममा जेनजी आन्दोलनमा इलाका प्रहरी कार्यालय दमकमा तोडफोड र आगजनी गर्ने चारजनालाई पक्राउ गर्न सफल भएको डीएसपी लम्सालले बताउनु भयो । उहाँले ग्राहकको इन्ट्री नगर्ने र सीसीटिभी नभएका होटलका संचालक ,लागूऔषधका प्रयोगकर्ता र कारोबारीलाई पक्राउ गरी कार्वाही चलाइएको जानकारी दिनु भयो । स्वीप अपरेसन प्रहरीको नियमित कर्तव्यभित्र पर्छ । अभियानकै रुपमा लगातार स्वीप अपरेसन गरेर अपराध नियन्त्रण र शान्ति सुरक्षा कायम गराउन सहयोग पुगेको उहाँको भनाई छ ।
स्वीप अपरेसनका क्रममा बुधवार राति ८ जना पक्राउ परेका छन् । राति ८ः३० बजे स्वीप अपरेसनमा खटिएको डीएसपी लम्साल नेतृत्वको प्रहरी टोलीले दमक –७ रतुवा खोला बाँधबाट लागूऔषध सेवनकर्ताहरुलाई नियन्त्रणमा लिएको छ ।
