दमक,७ पुस ।दमक नगरपालिकामा गरिएको माटो परीक्षणले यहाँको माटो उत्पादनका लागि उपयुक्त रहेको देखाएको छ। माटोको अम्लीयपना राम्रो अवस्थामा रहेको र समग्र रूपमा दमकको माटो उत्पादनशील रहेको परीक्षण प्रतिवेदनले देखाएको हो।दमक नगरपालिकाको समन्वय र कृषि ज्ञान केन्द्र झापाको प्राविधिक सहयोगमा सञ्चालन गरिएको घुम्ती माटो परीक्षण शिविरमा ५२ स्थानको माटो परीक्षण गरिएको थियो। यसका लागि करिब एक लाख रुपैयाँ खर्च भएको जनाइएको छ।
परीक्षणबाट माटोको अवस्था राम्रो देखिए पनि मलको सन्तुलन भने उपयुक्त नरहेको पाइएको छ। आवश्यकभन्दा बढी वा कम मल प्रयोग हुने प्रवृत्तिले दीर्घकालीन रूपमा माटो कमजोर हुने जोखिम रहेको विज्ञहरूले औंल्याएका छन्।कार्यक्रम सत्य संवादमा कुरा गर्दै दमक नगरपालिकाको कृषि शाखा प्रमुख चन्दा भट्टराईले माटो परीक्षण गर्दा उत्पादन बढ्ने मात्र नभई खेतीको लागतसमेत घट्ने चेतना किसानमा विस्तार भइरहेको बताउनुभयो। किसानहरूले अब कुनै पनि बाली लगाउनुअघि माटो परीक्षण गर्नुपर्ने रहेछ भन्ने बुझ्न थालेको उहाँको भनाइ छ।यदि यस्ता घुम्ती शिविर स्थानीय सरकारले सञ्चालन नगरे किसानले माटोको नमुना बोकेर बिर्तामोड र इटहरीसम्म जानुपर्ने बाध्यता हुने उहाँले स्पष्ट पार्नुभयो। यही कारण किसानको सहजताका लागि दमक नगरपालिकाले हरेक वर्ष माटो परीक्षण घुम्ती शिविर सञ्चालन गर्दै आएको जानकारी पनि उहाँले दिनुभयो।माटो जोगाएर खेती सुधार्ने लक्ष्यसहित सुरु गरिएको यो अभ्यासले दमकको कृषि भविष्य थप सुदृढ बनाउने अपेक्षा गरिएको छ।
