दमक, १२ पुस / जिन्दगीलाई प्रेमिल बनाउने कोशिष हरकोहीको हुन्छ नै । तर परिस्थिती सबैको बसमा हुँदैन । सृजनामार्फत भएपनि प्रेमिल भाव व्यक्त गरेर मनमा उर्जा भर्ने काम भनें सर्जकहरुले गरिरहेका हुन्छन् । त्यस्तै प्रेमिल गजलमार्फत भावना अभिव्यक्त गर्न माहिर हुनुहुन्छ झापा शिवसताक्षी १ धरमपुरका दिलिप घिमिरे ।
सीता घिमिरे र नेत्रप्रसाद घिमिरेका सन्तान दिलिपमा सानै उमेरबाट केही न केही लेख्ने रुचि थियो । त्यसमा धरमपुर निवासी हालका प्रख्यात हास्यव्यग्यकार मनोज गजुरेलको प्रोत्साहनले उहाँलाई सर्जकका रुपमा अघि बढाउने मुख्य काम गर्यो । लेख्ने क्रममा उहाँलाई गजल विधाले तान्यो र पूर्वको गजल अभियन्ताका रुपमा सक्रिय बन्दै जानुभयो । उहाँको ०६७ मा गजल संग्रह ‘तिमीलाई सम्झेपछि’ प्रकाशित भयो भनें गजलको एल्बम ‘तिम्रो याद’ र ‘प्यास’ समेत बजारमा आए । उहाँको गजल चलचित्रमा समेत समावेश हुनपुगेर गजललाई अझ फराकिलो बनाउन मद्धत गरेको छ । गीत लेखनमा पनि माहिर उहाँका चलचित्र सहितमा गीत र गजल गरी हालसम्म २१ वटा रेकर्ड भएका छन् ।
तात्कालिन पूर्वाञ्चल गजल मञ्चको सदस्यका साथै प्रगतिशील लेखक संघ कोशीको सचिवालय सदस्य, धरमपुरस्थित धर्नासो साहित्य प्रतिष्ठान र हाल नवनासो साहित्य प्रतिष्ठानका अध्यक्ष, साहित्य चौतारी विर्तामोडको सचिव रहेर साहित्यिक गतिविधिमा सक्रिय हुनुहुन्छ । ‘स्वीकारोक्ति’ अवधारणामा पनि नेपाल सदस्य भएर जोडिनु भएको छ ।
उहाँले आफूलाई सञ्चारकर्मीका रुपमा समेत उभ्याउनु भएको छ । विर्तामोडको सूर्योदय टिभीमा विगत ७ वर्षदेखि सृजनाको कार्यक्रम सुसेली प्रस्तुत गर्दै आउनु भएको छ । नेपाली साहित्य डट कममा सम्पादकको भूमिका निर्वाह गर्नुभएको छ । पत्रकार मञ्च दमकको सदस्य समेत हुनुहुन्छ ।
उहाँले साहित्य चौतारी प्रतिभा पुरस्कार –२०६१, असम लेखिका समाज गुवाहाटी, साहित्याकाश सम्मान, मनाहाङ् स्मृति पत्रकारिता पुरस्कार–२०८१ सहित दर्जनौं सम्मान र पुरस्कार प्राप्त गरी आफूलाई सधैं प्रेमिल र उर्जाशील बनाइरहनु भएको छ । उहाँसँग उज्यालो खबरको अनुशीलन कार्यक्रममा गरिएको कुराकानीको भिडिओ हेर्नुहोला :
