विराटनगर,१६ पुस । गृहमन्त्री ओम प्रकाश अर्यालले आगामी फागुन २१ गते हुने प्रतिनिधि सभाको निर्वाचन तोकिएकै मितिमा धाधलीरहित, निष्पक्ष र भयरहित वातावरणमा सम्पन्न हुने उद्घोष गर्नु भएको छ् । विराटनगरस्थित एसियाटिक होटलमा बुधबारदेखि सुरु भएको ‘कोशी प्रदेश स्तरीय सुरक्षा गोष्ठी’ को उद्घाटन गर्दै गृहमन्त्री अर्यालले यस्तो बताउनु भएको हो।
गृह मन्त्रालय र कोशी प्रदेश सरकार, आन्तरिक मामिला तथा कानून मन्त्रालयको संयुक्त आयोजनामा सुरु भएको गोष्ठीमा उहाँले निर्वाचनलाई सफलतापूर्वक सम्पन्न गर्न सरकारले सुरक्षा रणनीतिलाई मजबुत बनाइरहेको उल्लेख गर्नु भयो ।
गोष्ठीलाई सम्बोधन गर्दै गृहमन्त्री अर्यालले भन्नु भयो, “निर्वाचन लोकतन्त्रको अभिन्न प्रक्रिया हो । आगामी फागुन २१ गतेका लागि तय गरिएको निर्वाचनलाई स्वच्छ, निष्पक्ष र धाधलीरहित बनाउन सरकार प्रतिबद्ध छ । यसका लागि आवश्यक सुरक्षा कार्ययोजना स्वीकृत भई कार्यान्वयनको चरणमा पुगिसकेको छ ।”
उहाँले भन्नु भयो, “जेन्जी जनआन्दोलन पछिको बदलिँदो परिस्थितिमा गृह प्रशासन सम्हाल्नु चुनौतीपूर्ण भए पनि सरकारले सुरक्षा र सुशासनलाई मुख्य प्राथमिकतामा राखेको छ । आन्दोलनका घाइते तथा अपाङ्गता भएका व्यक्तिहरूलाई राहत र सहयोग पु¥याउने कार्यविधि समेत स्वीकृत भइसकेको छ ।”
गृहमन्त्री अर्यालले १४ वटै जिल्लाका सुरक्षा प्रमुखहरूलाई निर्देशन दिँदै निर्वाचन केन्द्रित सुरक्षा योजनामा कुनै सम्झौता नगर्न आग्रह गर्नु भएको छ। प्रदेश स्तरमा मुख्य सचिवको संयोजकत्वमा निर्वाचन सेल गठन भइसकेको जानकारी दिँदै उहाँले निर्वाचन पूर्व, निर्वाचनको समय र निर्वाचन पश्चात्को सुरक्षा संवेदनशीलतालाई ध्यान दिन आग्रह गर्नु भएको छ ।
