काठमाडौं,१८ पुस । नेपाली कांग्रेसको संस्थापन पक्षले महामन्त्रीद्वय गगन थापा र विश्वप्रकाश शर्माले नियमित महाधिवेशन रोकेको आरोप लगाएको छ । अब आसन्न प्रतिनिधिसभा सदस्य निर्वाचनअघि महाधिवेशन नै नगर्ने निष्कर्ष निकालिएको हो ।
शुक्रबार (पुस १८) दिउँसो ३ बजे सानेपामा बस्ने केन्द्रीय कार्यसम्पादन समितिको बैठकबाट यही निर्णय गर्ने संस्थापनको रणनीति रहेको छ । नियमित महाधिवेशनको कार्यतालिका प्रभावित हुनुमा महामन्त्री नै जिम्मेवार रहेको संस्थापनको ठहर रहेको छ ।
समयमै सदस्यता नवीकरण र नयाँ वितरण गर्न आफू असफल भएको दोष महामन्त्री थापाले संस्थापनलाई लगाउँदै हिँडेको एक नेताले बताउनु भयो । “तपाईंहरू सबैले हाम्रो महाधिवेशन कार्यतालिका हेर्नुभएको छ । त्यसमा मंसिर २४ भित्र क्रियाशील सदस्यता फाराम निर्वाचन क्षेत्रमा पुगिसक्नुपर्ने थियो,” संस्थापन पक्षका एक नेताले भन्नु भयो, “उहाँले सदस्यता फाराम पुस ५ मा पठाउँदै हुनुहुन्थ्यो ।”
‘सदस्यता वितरण प्रभावकारी रूपमा गर्नू’ भन्दै महामन्त्रीले मंसिर ८ गते परिपत्र जारी गरेका ती नेताले बताँउनु भयो । “त्यस दिन कार्यतालिकामा के गर्ने भन्ने थियो ?,” ती नेताले प्रश्न गर्नु भयो।
यही पुस ९ गते बसेको कार्यसम्पादन समितिको बैठकपछि महामन्त्री थापाले क्रियाशील नटुंग्याइएका क्षेत्रमा केन्द्रबाटै प्रतिनिधि पठाएर सदस्यता विवाद टुंग्याउने र २१ गते वडा अधिवेशनको प्रस्ताव गर्नु भएको थियो।
वडा अधिवेशनपछि पुस २३ गते प्रतिनिधिसभा निर्वाचन क्षेत्रको अधिवेशनबाट महाधिवेशन प्रतिनिधि चयन गर्ने उहाँले प्रस्ताव गर्नु भएको थियो । त्यसपछि पुस २६–२८ मा पूर्वनिर्धारित मितिमै महाधिवेशनको प्रस्ताव उहाँले गर्नु भएको थियो ।
उक्त प्रस्तावमा सहमति वा विमति नहुँदै निर्वाचनका निम्ति समानुपातिकतर्फको बन्दसूची पेस गर्ने गृहकार्यमा कांग्रेस नेतृत्व जुटेको थियो । थापाले राखेको प्रस्तावमा कुनै निर्णय भएको थिएन ।
पुस १६ मा वडा तह र १७ गते पालिकास्तरीय अधिवेशनको मिति तोकिएको थियो । यी दुवै अधिवेशन नभएपछि महामन्त्रीद्वयले बिहीबार (पुस १७) संयुक्त रूपमा विज्ञप्ति जारी गर्दै नियमित महाधिवेशन स्थगन गरेको छ । उनीहरूले विशेष महाधिवेशनका निम्ति यही पुस २७ र २८ गतेको मिति समेत तोकेका छन् ।
त्यसअघि, गएको बुधबार (पुस १६) नै ‘नेपाली कांग्रेस विशेष महाधिवेशन आयोजक समिति २०८२’ का नाममा काठमाडौंको भृकुटीमण्डपस्थित ‘हल बुक’ गरिएको छ । पार्टीको धादिङ जिल्लाका पूर्वसभापति रमेश धमला र अर्घाखाँचीका नेता लेखनाथ पोखरेलले हल बुक गर्नु भएको छ ।
