विराटनगर । सामूहिक वस्ती विकासको गर्ने उद्देश्यले विराटनगर–१९ धरमपुरामा विराटनगर महानगरपालिकाले निर्माण गरेको नयाँ संरचनामा ३२ परिवारले आश्रय पाएका छन् ।
अल्पसंख्यक मुसहर (ऋषिदेव) समुदायका स्थानीयको लागि ‘महानगर आवास’ योजनाअन्तर्गत वस्ती निर्माण गरी हस्तान्तरण गरिएको हो ।
स्थानीयका अनुसार नयाँ घरमा सरेपछि अब सिंघीया खोलाको बाढीले उठिबास लगाउने हो कि भन्ने रत्तिभर पिर छैन ।
‘नयाँ बस्तीमा सरेपछि त चैनको निन्द्रा पर्न थालेको छ’ स्थानीय कविता ऋषिदेवले भनिन्, ‘छोराछोरी धुलोहिलोमा डुब्लान भन्ने पिर पनि अब हटेको छ ।’ एक परिवारका लागि दुईवटा सुत्ने कोठा, एक भान्सा घर र शौचालयसहितको व्यवस्थित घर बनेको छ ।
विराटनगर महानगरपालिकाले बस्तीमा नाला, बाटो बनाई खानेपानीका लागि ट्यूबेल जडान गरिदिएको छ । यही भौतिक संरचनामा क्रृषिदेव परिवारको दिनचर्या चल्न थालेको छ ।
लालसे ऋषिदेवलाई खोला किनारको झुप्रोबाट कहिल्यै पार नपाइएला कि भन्ने ठूलो चिन्ता थियो । सिंघीयाको बाढीले घर बगाएपछि उनी निक्कै लामो समय दाताले दिएको पालमुनि ओत्तिएका उनलाई अब न खोला न त बाढीले अत्यास पार्ने हो कि भन्ने पिर छ । ‘हाम्रो त दिन फिरेर आएको छ । अहिले त पक्की घरमा बस्न पाइएको छ’ उनले भने ।
कविता र लालसे जस्तै मुनिश्री ऋषिदेवका दिन पनि फिरेका छन् । श्रीमान र उनी दैनिक ज्यालादारीमा श्रम गर्छन् । दैनिक हुने कमाईले परिवार चलेको छ । छोराछोरीलाई पनि नजिकैको आधारभुत विद्यालयमा पढाउन सजिलो भएको छ ।
महानगरपालिका सामाजिक विकास महाशाखाका प्रमुख पुनम दाहालका अनुसार घर नभएका विपन्न परिवारलाई लक्षित गरी ३२ घर निर्माण गरिएको हो । महानगर प्रमुख भीम पराजुलीले बाढीबाट हरेक वर्ष डुबानमा पर्ने विपन्नका बस्तीलाई सुरक्षित स्थानमा सार्ने उद्देश्यसाथ आवास योजना अघि सारिएको बताएका छन् ।
बस्ती विकासमा महानगरपालिकासँग हेबट्याट्स फर ह्युम्यानिटी, जीवन विकास र सहारा नेपालले साझेदारी गरेका छन । भवन निर्माणको सबै खर्च हेबट्याट्सले गरेको हो भने महानगरले सडक तथा ढल निर्माणमा लगानी गरेको छ ।
