उर्लाबारीमा सडक दुर्घटना सम्बन्धि सचेतता कार्यक्रम

उर्लाबारी | १९ पुस | सडक यातायात दुर्घटनाका कारण बढ्दो मानवीय क्षतिलाई न्युनिकरण गर्ने उद्देश्यले एन्जल फाउन्डेसनको आयोजनामा सडक यातायात दुर्घटना सम्बन्धी सचेतना कार्यक्रम सम्पन्न भएको छ।
कार्यक्रम एन्जल फाउन्डेसनका प्रमुख कार्यकारी अधिकृत जय सिंह राजवंशीको सभापतित्वमा सम्पन्न भएको हो। कार्यक्रममा इलाका प्रहरी कार्यालय उर्लाबारीका प्रहरी निरीक्षक रञ्जन बराल प्रमुख अतिथिका रूपमा उपस्थित रहनु भएको थियो।
प्रमुख अतिथि बरालले सवारी साधन चलाउँदा अनिवार्य रूपमा पालना गर्नुपर्ने ट्राफिक नियम, सडक सुरक्षा र जिम्मेवार सवारी चलाउने अभ्यासका विषयमा सहभागी चालकहरूलाई प्रशिक्षण दिनु भयो।
त्यसैगरी एन्जल फाउन्डेसनका प्रमुख कार्यकारी अधिकृत जय सिंह राजवंशीले सडक दुर्घटना भइहालेको अवस्थामा स्थानीय स्तरमा उपलब्ध साधन स्रोतको प्रयोग गरी कसरी जीवन रक्षा गर्न सकिन्छ भन्ने विषयमा व्यवहारिक प्रशिक्षण दिनु भएको थियो।
कार्यक्रममा मन्तव्य राख्दै फरिस्ता क्लिनिककी मेडिकल अधिकृत डा. रम्भा मण्डलले सवारी चालकहरूको दैनिक जीवनशैली, स्वास्थ्य सचेतना र सुरक्षित जीवन पद्धतिका विषयमा जानकारी गराउनु भयो।
सन्तोष कार्कीको सञ्चालनमा सम्पन्न कार्यक्रममा सिटी सवारी र अटो सवारी चालक गरी जम्मा ५५ जनाको सहभागिता रहेको थियो।