काठमाडौँ,२१ पुस । आगामी फागुन २१ गते हुने प्रतिनिधिसभा निर्वाचनका लागि नेकपा (एमाले) ले देशभर उम्मेदवार सिफारिस गर्ने प्रक्रियालाई तीव्र पारि रहेको छ। पार्टी केन्द्रको निर्देशनअनुसार जिल्ला र निर्वाचन क्षेत्रीय कमिटीहरूले उम्मेदवारको नाम सिफारिस गरिरहेका छन्।
एमाले सचिव महेश बस्नेतका अनुसार हालसम्म २४ वटा निर्वाचन क्षेत्रबाट उम्मेदवारको एकल नाम सिफारिस भइसकेको छ भने कतिपय जिल्लाबाट सर्वसम्मत रूपमा एकल नाम पठाइएको छ ।केही स्थानमा एकभन्दा बढी आकांक्षीको नाम सिफारिस गरी केन्द्रमा पठाइएको हो।
अहिलेसम्म एकल सिफारिस हुनेहरूमा पार्टी अध्यक्ष केपी शर्मा ओली (झापा–५), महासचिव शंकर पोखरेल (दाङ–२) र उपाध्यक्ष विष्णु पौडेल (रुपन्देही–२) रहनु भएको छ । त्यस्तै, काठमाडौँ–५ बाट ईश्वर पोखरेल, गुल्मी–१ बाट प्रदीप ज्ञवाली, गुल्मी– २ बाट गोकर्ण विष्ट, भक्तपुर–२ बाट महेश बस्नेत र कैलाली–४ बाट लेखराज भट्टको नाम एकल रूपमा सिफारिस हुनु भएको छ। मधेस प्रदेशका सिरहा–३ बाट लीलानाथ श्रेष्ठ, रौतहट–१ बाट अजय गुप्ता, सर्लाही–३ बाट हरि उप्रेती र महोत्तरी–१ बाट लक्ष्मी महतो कोइरीको नाम पनि एकल सिफारिसमा परेको हो।
त्यसैगरी नुवाकोट–१ बाट बद्री मैनाली, गोरखा–२ बाट मिलन गुरुङ, नवलपुर–२ बाट तिलक महत, कपिलवस्तु–१ बाट विश्राम चौधरी र बाँकेका दुई क्षेत्रबाट क्रमशः सूर्य ढकाल र दलबहादुर सुनार सिफारिस हुनु भएको छ्। कोशी प्रदेशको इलाम–२ बाट सुहाङ नेम्वाङको नाम तय भएको छ भने कर्णाली र सुदूरपश्चिमबाट सुर्खेतका दुवै क्षेत्रमा ध्रुव शाही र कलाधर देवकोटा, सल्यानबाट गुलाबजङ्ग शाह, बैतडीबाट दामोदर भण्डारी र दार्चुलाबाट गणेश ठगुन्नाको नाम एकल रूपमा सिफारिस भएको हो। काठमाडौँ–२ बाट भने मणिराम फुयाँलको नाम प्रस्ताव गरिएको हो।
अन्य केही निर्वाचन क्षेत्र र जिल्लाहरूमा उम्मेदवार छनोटको प्रक्रिया अझै जारी रहेको छ। सबै जिल्ला र निर्वाचन क्षेत्रबाट आएका सिफारिसहरू केन्द्रमा पुगेपछि उम्मेदवारको अन्तिम टुङ्गो भने पार्टीको केन्द्रीय कमिटीले लगाउने एमालेले बताएको छ।
