पथरी, २१ पुस / मोरङको पथरी शनिश्चरे ९ स्थित श्री सिंहवाहिनी मावि भूतपूर्व विद्यार्थी सञ्जालको पुस २७ मा हुने प्रथम वार्षिक साधारणसभाको अवसरमा पाइलटसहित विद्यालयमा विशेष योगदान पुर्याउने ६ जनालाई सम्मानित गरिने भएको छ ।
सञ्जालका अध्यक्ष राजकुमार राईको अध्यक्षताको पछिल्लो बैठकले सम्मान छनोट समितिले सिफारिस गरेका पूर्व विद्यार्थी पाइलट डा.भोगेन्द्र कठायतसहितलाई सम्मानित गर्ने निर्णय गरेको हो । ०३५ सालमा स्थापना भएको सो विद्यालय व्यवस्थापन समितिका संस्थापक अध्यक्ष गणेशबहादुर बस्नेत, चौथो अध्यक्ष गोपाल नेपाललाई पनि दोसल्ला र सम्मानपत्रले सम्मानित गर्ने निर्णय भएको छ । त्यस्तै, दोस्रो अध्यक्ष स्व. धर्मानन्द पराजुली, तेस्रो अध्यक्ष स्व. पुष्पबहादुर चौहानलाई समेत मरणोप्राप्त सम्मानित गरिने छ । सञ्जाल सचिव भूपेन्द्रराज तिम्सिना संयोजक रहेको सम्मान छनोट समितिमा सञ्जाल उपाध्यक्ष राजकुमार विश्वकर्मा र विद्यालयका प्रधानाध्यापक एवम् सञ्जाल सल्लाहकार उमेशकुमार खड्का सदस्य रहनु भएको थियो । विद्यालयको उन्नतिमा योगदान दिने तथा भूतपूर्व विद्यार्थीका रुपमा ख्याति कमाएकाहरुलाई वर्षेनी क्रमशः सम्मानित गर्दै लाने सञ्जालको योजना रहेको छ ।
विद्यालयको खेलमैदान क्षेत्रमा हुने विद्यार्थी पुनर्मिलनसहितको सो कार्यक्रममा सञ्जालका हालसम्मका गतिविधि, अक्षयकोष निर्माणको योजना तथा विद्यालयकातर्फबाट विद्यालयका गतिविधि सम्बन्धिका प्रतिवेदन प्रस्तुत हुनेछन् ।
भूपू विद्यार्थीहरुबीचको एकता, सद्भावका साथै विद्यालयमा गुणस्तरीय शिक्षा तथा विद्यार्थीको पठनपाठनमा सघाउने योजना अनुरुप ०८१ पुस २७ मा भएको दोस्रो पुनर्मिलन कार्यक्रमबाट औपचारिक रुपमा सञ्जाल गठन गरी नगरपालिका कार्यालयमा दर्ता गरिएको छ । यो तेस्रो पुनर्मिलन कार्यक्रम हो । सञ्जाल कोषाध्यष शारदादेवी बस्नेतको संयोजकत्वमा कार्यक्रम व्यवस्थापन समिति गठन गरिएको छ ।
सञ्जालको पहलमा यसअघि विद्यालयमा खानेपानीको प्लान्ट जडान तथा विद्यालय रंगरोगन कार्य सम्पन्न भएको छ ।
