पथरी शनिश्चरे, २ फागुन / मोरङको पथरी शनिश्चरे नगरमा ‘सातौँ राष्ट्रपति रनिङ शिल्ड खेलकुद प्रतियोगिता—२०८२’ भव्यतापूर्वक सम्पन्न भएको छ ।
पञ्चायत माविमा सञ्चालित प्रतियोगितामा वडा नम्बर २ को रेडस्टार बोर्डिङ स्कुल भारी पदकको साथ प्रथम भएको छ । जो संस्थागत विद्यालयतर्फ पहिलो पटक प्रथम बन्न पुगेको छ । रेडस्टार बोर्डिङ स्कुलले १९ वटा स्वर्ण, ५ वटा रजत र ४ वटा काँस्यसहित २८ पदकको साथ प्रथम भएको हो ।
८ स्थित बुद्ध मावि ७ स्वर्ण, ७ रजत र ६ काँस्य पदक जितेर दोस्रो भएको छ । बुद्ध मावि गत वर्ष प्रथम भएको थियो ।
जनता मावि ६ वडा स्वर्ण, ५ रजत र १ काँस्यसहित १२ पदक जितेर तेस्रो भएको छ । पञ्चायत माविले ६ स्वर्ण, ६ रजत र ३ काँस्य पदक जितेको छ ।
त्यसैगरी, भागिरथ माविले ५ स्वर्ण, २ रजत, ५ काँस्य पदकसहित १२ वटा पदक जितेको छ । अरुणोदय बोर्डिङ स्कुलले ४ स्वर्ण, २ रजत, १ काँस्यसहित ७, भूपू सैनिक बोर्डिङ स्कुलले २ स्वर्ण, १ कास्य पदकसहित ३, वाल्मीकि, बाल नमुना, मोरङ मेरिगोल्ड, बोर्डिङ स्कुल, वालकल्याण, चन्द्रकिरातेश्वर र सिंहवाहिनी माविले एक एक स्वर्ण पदक जितेका छन् ।
सुनाखरी, सुगाहाट, प्याराडाइज, एभरेष्ट बोर्डिङ, दुर्गा मावि, अन्नपूर्ण, अमरसिंह माविले केहीले रजत र केहीले काँस्य पदक जितेको छ ।
भलिबल र कपर्दी (छात्र, छात्रा) विभिन्न दुरीको दौड, कराते, हाइजम्प, लङजम्प, ट्रिपलजम्प, सटफुट लगायत खेलमा ५४ वटा गोल्ड मेडलको लागि प्रतियोगिता भएको थियो ।
माघ २७ देखि २९ गतेसम्म भएको खेलकुद प्रतियोगितामा पदक र पुरस्कार विजेता विद्यालय र खेलाडीलाई पथरी शनिश्चरे नगर प्रमु्ख मोहनप्रसाद तुम्वापो, १ नं. वडा अध्यक्ष भीमकुमार राई, आयोजक समिति सदस्यसमेत रहेका पञ्चायत माविका प्रधानाध्यक्षक अर्जुनकुमार बुढाथोकी लगायतबाट शिल्ड, ट्रफी, प्रमाणपत्र र मेडलहरु वितरण भएको थियो ।
भलिबलमा एभरेष्ट दोस्रो
भलिबल प्रतियोगिता महिला र पुरुष दुवैमा पथरीशनिश्चरे—१ स्थित एभरेष्ट बोर्डिङ स्कुल दोस्रोहुँदै रजत मेडलमा चित्त बुझाउनु परेको छ । दुवै खेलमा रेडस्टार बोर्डिङ स्कुलले स्वर्ण पदक जितेर जिल्ला स्तरीय खेलमा सहभागी हुने भएको छ ।
यो पटक जिल्ला स्तरीय प्रतियोगिता समेत जित्नेगरी तयारी गर्ने रेडस्टार बोर्डिङ स्कुलका प्रिन्सिपल टीएन तिम्सिनाले बताउनु भयो । नगरमा प्रथम भएका खेलाडीहरुले जिल्लामा पथरीशनिश्चरे नगरको जर्सी लगाएर जिल्ला स्तरीय प्रतियोगितामा सहभागीहुने छन् ।
