पथरी, १५ चैत / नेपथ्यमै बस्न रुचाउने तर प्रभावकारी लेखनका सर्जक टंक आचार्य आफ्नो ४० वर्षे लेखनयात्राको पछिल्लो समय ‘तथास्तु :अवशेष’ कृति मार्फत प्रस्तुत हुनु भएको छ ।
सो लेख संग्रहको ऐतिहासिक पत्रिका ‘रचना’का सम्पादक पुराना साहित्यकार रोचक घिमिरेले दमकमा एक कार्यक्रमकाबीच लोकार्पण गर्नुभयो । प्रतिभा निकेतन र साहित्य कला संगमको संयुक्त आयोजनामा विद्याशिल्प एकेडेमी दमक १ मा आयोजित कार्यक्रममा पुस्तक लोकार्पण पछि बोल्दै प्रमुख अतिथि घिमिरेले सर्जक आचार्य परिवारसँगको पुरानो सम्बन्ध रहेको प्रसंग ल्याउनु भयो । टंकसँग त्यति चिनजान नभएपनि टंकका बुबा कमल जंगली र दाजू जीवन आचार्यको प्रभावकारिता चर्चा भयो ।
अमेरिका बस्दै आउनु भएका आचार्य दमक आएको बेला हुटहुटी लगाउँदै १ सय ४५ वटा लेख समावेश ३ सय ७६ पृष्ठको सो कृति प्रकाशनको तारतम्य मिलाउने काम गर्नुभयो अगुवा सर्जक प्रा.डा.गोविन्दराज भट्टराईले । सर्जकलाई प्रोत्साहन गर्दै आउनु हुने भट्टराईले लोकार्पण कार्यक्रमको संयोजन गर्दै लामो समयदेखि पत्रिकाहरुमा प्रकाशित लेखहरु एकै ठाउँमा संग्रहित गराउनु महत्वपूर्ण काम भएको चर्चा गर्नुभयो । ‘छरिएका फुटकर सृजनाले मात्र सर्जक त्यति नठहरिने परिवेशमा ४० वर्षदेखिको लेखहरुको कृतिका रुपमा पुस्तक आउनु महत्वपूर्ण कुरा हो । पुस्तक सम्पादनका केही कमजोरी भएपनि गहन पुस्तक आएको छ ।’– उहाँले भन्नु भयो ।
टंक आचार्यको कृतित्व र व्यक्तित्वमाथि बोल्दै दमकका पुराना साहित्यकार प्रकाश बुढाथोकीले लामो समयदेखिको लेखनमा सक्रियताले प्रभावकारी पुस्तकको जन्म भएको दृष्तान्त प्रस्तुत गर्नुभयो । उहाँले त्यो बेला विभिन्न शिर्षकमा स्तम्भ लेखन अघि बढेको सन्दर्भ समेत जोड्नु भयो ।
कृतिमाथि समीक्षात्मक टिप्पणी व्यक्त गर्दै लेखक व्यञ्जना शर्माले नेपाली साहित्यमा आचार्यले गहकिलो पुस्तक प्रकाशन गर्नुभएको उल्लेख गर्नुभयो । कार्यक्रममा प्रतिभा निकेतनका संस्थापक अध्यक्ष खेमलाल शर्मा र साहित्य कला संगमका अध्यक्ष बिन्दु दहाल मूकदर्शकले आयोजकको संस्थागत भूमिका निर्वाह गर्नु भएको थियो ।
वक्ताहरुले आचार्यको पुस्तक गहन र ऐतिहासिक रहेको भएपनि कुन कुन पत्रिकामा कुन कुन मितिमा लेखहरु प्रकाशन भएका हुन् भन्ने विषय छुट्न गएको टिप्पणी गरेका थिए । शिर्षकमा समेत समस्या देखिएको छ । आचार्यले दमककै पूर्व सन्देश दैनिकमा ‘तथास्तु’ र झापा पोष्ट दैनिकमा ‘अवशेष’ स्तम्भ लेख्नु भएको थियो । समसामयिकतालाई पौराणिक घटना र पात्रसँग जोडेर लेख्न रुचाउने उहाँका तिनै पत्रिकामा प्रकाशित लेखहरुलाई उहाँले पुस्तकको आकार दिनु भएको हो । आन्तरिक रुपमा निकै रमाइला आचार्य अमेरिका फर्किने समय भइसकेका कारण सो पुस्तक लोकार्पण कार्यक्रममा भनें उपस्थित रहन सक्नु भएन । तर उज्यालो खबरसँगको सम्पर्कमा आचार्यले हतारोमा पुस्तक प्रकाशन गरिएकाले शिर्षक, प्रकाशित लेखको पत्रिकाको नाम र मितिमा समस्या भएको उल्लेख गर्नुभयो । पुस्तक सेर्गेम प्रकाशन दमककोतर्फबाट इन्दिरा आचार्यको प्रकाशनका प्रकाशित भयो ।
उहाँको २०६१ सालमा पहिलो कृति कविता संग्रह ‘फेरि एउटा अर्को कुरुक्षेत्र’ प्रकाशित भएको थियो । कविता लेखनमा समेत उहाँको कलम सशक्त छ । उहाँसँग पत्रकारिताको केही अनुभव समेत छ । आफ्नै सहोदर दाजू प्रभावकारी सृजनाका सर्जक जीवन आचार्यको स्मृतिमा गठित जीवन स्मृति प्रतिष्ठानका अभियन्ता, मुक्त अभियानका संयोजकसहितका विभिन्न साहित्यिक र सामाजिक संघ संस्थामा आवद्ध भएर क्रियाशील बन्नु भएको थियो । उहाँ विगत ३ वर्षयता अमेरिकामा बसोबास गर्दै उतैका सृजनशील गतिविधिमा समेत सक्रिय बन्दै आउनु भएको छ ।
