दमक/
मोरङको लेटाङ–५ मा हिजो आक्रोशित भिडको आक्रमणमा एक महिला प्रहरीको मृत्यु भए पछि त्यस आसपासको क्षेत्रमा कर्फ्यु लगाईएको जिल्ला प्रशासन कार्यालय मोरङले जनाएको छ ।
आक्रोशित स्थानीय बासिन्दाले प्रहरीमाथि नै आक्रमण गरेको र आक्रमणमा परेर प्रहरी जवान श्रेष्ठको ज्यान गएको मोरङका प्रमुख जिल्ला अधिकारी काशीराज दाहालले उज्यालोलाई बताउनुभयो । उहाँका अनुसार अरु केही प्रहरी घाइते भएका छन् ।
आक्रोशित भिडलाई नियन्त्रणमा लिन प्रहरीले केही सेल अश्रु ग्यास र हवाई फायर गरेको थियो । अहिले स्थिति नियन्त्रणमा आएको र लेटाङ आसपासका क्षेत्रमा बिहान ७ बजेदेखि अर्को आदेश नभएसम्मका लागि कर्फ्यु लगाइएको प्रमुख जिल्ला अधिकारी दाहालले जानकारी दिनुभयो ।
कर्फ्यु लाग्ने क्षेत्रको चार किल्लाबारे जानकारी दिदै प्रमुख जिल्ला अधिकारी दाहालले भन्नू भयो ” दक्षिणमा लेटाङ नगरपालिका वडा नम्बर ३ र ४को गंगेचोक र कमलपुर क्षेत्र , वडा नम्बर ५ को सम्पुर्ण क्षेत्र,उत्तरमा वडा नम्बर ६ को वडा कार्यालय क्षेत्र , पुर्वमा मोरङ्गे खोला क्षेत्र र पश्चिम्मा चिसाङ खोला क्षेत्रमा अर्को सुचना जारी नभए सम्म अनिश्चितकालीन कर्फ्यु जारी गरिएको छ । “
घटना के हो?
स्थानीय शिक्षा विकास माविका एक शिक्षकले छात्रालाई यौन दुर्व्यवहारकाे प्रयास गरेको विषयमा भएको सर्वपक्षीय छलफलमा भिडको आक्रमणमा परि प्रहरी जवान उर्मिला श्रेष्ठको ज्यान गएको हो ।
उहाँको कोसी अस्पतालमा उपचारको लागि लैजाँदै गर्दा बाटोमै ज्यान गएको मोरङ प्रहरीले जनाएको छ ।
शुक्रवार होली खेल्ने क्रममा घर पुगेका शिक्षकले आफूलाई यौन दुर्व्यवहार गरेको १२ वर्षीया छात्राले बताएपछि हिजो विद्यालयमा यसबारे छलफल भएको थियो ।
छलफल भइरहँदा स्थानीयले शिक्षकलाई बन्दी बनाएर आक्रमणको प्रयास गरेपछि प्रहरी परिचालन गरिएको थियो ।
