दमक,३१ वैशाख । विशाल खेल मैदान । बीचमा पसिना बगाउँदै गरेका जोसिला खेलाडी। अनि मैदानको चारैतिर आफ्ना मनपर्ने टोलीलाई उत्साह थप्दै चिच्याइरहेका हजारौँ दर्शक। यो कुनै अन्तराष्ट्रिय प्रतियोगिताको दृश्य होइन, यो त दमक–१० स्थित आम्बारी खेल मैदानमा सजिएको ’दोस्रो दमक खेलकुद महोत्सव’ को भव्य समापनको रौनक हो। बैशाख २१ गतेदेखि सुरु भएको यो खेल कुम्भको अन्तिम दिन बुधबार, मैदानमा दमक–३ र वडा नम्बर ५ बीच ’महाभिडन्त’ चलिरहेको थियो। निर्धारित समयसम्म दुवै टोलीले फलामको च्यूरा चपाए झैँ संघर्ष गरे, तर गोल हुन सकेन। अन्ततः खेल पेनाल्टी सुटआउटमा मोडियो। दर्शक र खेलाडी दुवैको ढुकढुकी बढेको त्यो क्षण. जहाँ एउटा प्रहारले भाग्य बदल्नेवाला थियो।
अन्ततः दमक–५ लाई पाखा लगाउँदै ३ गोलका विरुद्ध २ गोलको अन्तरले दमक–३ ले लगातार दोस्रो पटक महोत्सवको उपाधि चुम्न सफल भयो। र जीत्यो नगद १ लाख रुपैँया । दमक बजारबाट केही टाढा भए पनि दमक–१० को आम्बारी मैदान खेलका लागि विशेष मानिन्छ। मोरङ र झापाको संगमस्थल जस्तो लाग्ने यो ठाउँमा छिमेकी उर्लाबारीदेखिका खेल प्रेमीहरूको सहज पहुँच थियो। खेलकुदले केवल मनोरञ्जन मात्र दिँदैन, यसले त दमकको विकास र एकतालाई पनि जोड्ने गर्दछ। समापन समारोहमा दमकका नगर प्रमुख राम कुमार थापाले विगतका घटनाहरूलाई स्मरण गर्दै खेलकुदको माध्यमबाट नगरलाई जोड्ने प्रतिबद्धता जनाउनुभयो।
खेललाई भव्य बनाउन दमकका शिक्षासेवीहरूको पनि उत्तिकै साथ रह्यो। झापा मोडल अंग्रेजी माविका संस्थापक निर्देशकले खेलको प्रशंसा मात्र गर्नुभएन, आगामी वर्ष हुने तेस्रो महोत्सवका लागि १ लाख रुपैयाँ सहयोग गर्ने घोषणा गरेर खेलाडीको हौसला बढाउनुभयो। ९ वटा विधामा खेलाइएको यो महोत्सवले दमकका सयौँ प्रतिभालाई आफ्नो क्षमता देखाउने मञ्च प्रदान ग¥यो। हार र जित त खेलको पाटो मात्र हो, तर यो महोत्सवले दमकमा जुन एकता र खेल संस्कारको बीउ रोपेको छ, त्यो पक्कै पनि प्रशंसनीय छ। वैशाख २८ गते भव्य झाँकीसहित सुरु भएको यो महोत्सव २०८३ वैशाख ३० मा आएर औपचारिक रूपमा समापन भएको छ।
अपेक्षा गरौँ, आगामी वर्ष यो भन्दा अझ भव्य र सभ्य रूपमा ’तेस्रो दमक खेलकुद महोत्सव’ हामी माझ आउनेछ।
