ओखलढुंगा — ७२ सालको भूकम्पले क्षतिग्रस्त सरकारी कार्यालयमध्ये पुनर्निर्माणपछि बुधबार एकै पटक पाँच भवन हस्तान्तरण भएका छन् । सघन सहरी तथा भवन निर्माण आयोजना कार्यालयले राष्ट्रिय अनुसन्धान, जिल्ला पशु सेवा, जिल्ला भूसंरक्षण, खानेपानी तथा सरसफाइ डिभिजन र जिल्ला सरकारी वकिल कार्यालयको भवन हस्तान्तरण गरेको हो ।
यी भवन एसियाली विकास बैंकको ऋण सहयोगमा भूकम्प आकस्मिक सहायता आयोजनामार्फत पुनर्निर्माण गरिएका हुन् । यसको ठेक्का लगाउने, नियमन गर्ने सबै काम उक्त आयोजनाले गरेको हो । लुम्बिनी बिल्डर्स डाँफे जेभीले २०७४ साल कात्तिक २७ मा यी पाँच वटै भवन बनाउने ठेक्का एकमुष्ट रूपमा लिएको थियो । भ्याटसहित २१ करोड २८ लाख १५ हजार २ सय ४५ रुपैयाँमा भवन निर्माणको ठेक्का लागेको हो ।
यी भवनको भौतिक निर्माण पूर्ण रूपमा सकिएको र वित्तीय प्रगति ९३ प्रतिशत पूरा भएको आयोजनाले जनाएको छ । कार्यालयका प्रमुख तुल्सीराम खर्बुजाले थप गरिएको म्यादमा काम सम्पन्न नगरेबापत निर्माण व्यवसायीले १२ लाखभन्दा बढी हर्जना तिरेको बताए । सिद्धिचरण नगरपालिकाका मेयर मोहनकुमार श्रेष्ठले भवन सम्पन्न भएका कार्यालय प्रमुखलाई सम्पन्नताको प्रमाणपत्र हस्तान्तरण गरे ।
नवनिर्मित भवनको संरक्षण र सदुपयोग गर्ने जिम्मा सम्बन्धित सरकारी कार्यालयको हातमा आएको उनले बताए । साथै यी भवनको बेलाबेलामा मर्मतसम्भार सम्बन्धित कार्यालय मातहतका निकायमा पहल गरेर निरन्तरता दिइरहनुपर्ने मेयर श्रेष्ठले बताए ।
