दमक । १ असार । दमक नगरपालिकाले मंगलबार एक दिनका लागि स्थानीय सार्वजनिक बिदा घोषणा गरेको छ ।
नगरपालिकाले सोमबार जारी गरेको विज्ञप्तिमार्फत धिमाल समुदायको महत्वपूर्ण सांस्कृतिक पर्व ‘सुरुवा जातिरी’ को अवसरमा नगरभित्रका सबै मातहतका कार्यालय तथा संस्थाहरूमा बिदा दिने निर्णय गरिएको जनाएको हो ।
नगर कार्यपालिकाको शनिबार बसेको बैठकले उक्त निर्णय गरेको नगरपालिकाले स्पष्ट पारेको छ । धिमाल समुदाय दमकको आदिवासी तथा प्रथम बसोबासी समुदाय भएकाले उनीहरूको मौलिक संस्कृति, परम्परा र पर्वप्रति सम्मान व्यक्त गर्दै स्थानीय बिदा दिने निर्णय गरिएको विज्ञप्तिमा उल्लेख छ ।
नगर प्रमुख रामकुमार थापाद्वारा हस्ताक्षरित विज्ञप्तिअनुसार दमक नगरपालिका कार्यालय, सबै वडा कार्यालय, आधारभूत स्वास्थ्य केन्द्र तथा नगरपालिकामातहत सञ्चालनमा रहेका शैक्षिक संस्थाहरूमा मंगलबार सार्वजनिक बिदा रहनेछ ।
नगरपालिकाले सुरुवा जातिरी पर्व मनाउने सम्पूर्ण धिमाल समुदायप्रति शुभकामना व्यक्त गर्दै पर्वले सामाजिक सद्भाव, सांस्कृतिक संरक्षण र समुदायबीचको एकतालाई थप मजबुत बनाउने विश्वास व्यक्त गरेको छ ।
