झापा, ५ असार । झापाको कनकाई नगरपालिका–५ तुलसीवारीस्थित भित्री सडक खण्डमा ट्रयाक्टर र मोटरसाइकल आपसमा ठोक्किँदा बाबु र छोरीको मृत्यु भएको छ भने आमा गम्भीर घाइते भएकी छिन् ।
शुक्रबार दिउँसो करिब १२ बजे सुरुङ्गाबाट झापा बजारको तर्फ जाँदै गरेको मे ४ प ५४५ नम्बरको मोटरसाइकल र खेत जोतेर सडकमा निस्कँदै गरेको मे १ त ७४०४ नम्बरको ट्रयाक्टर एकआपसमा ठोक्किएका हुन् ।
दुर्घटनामा परि मोटरसाइकल चालक झापा गाउँपालिका–३ बस्ने २० वर्षीय समिर अली र उनकी ५ वर्षीया छोरी हाजिरा खातुनको मृत्यु भएको प्रहरीले जनाएको छ । दुर्घटना लगतै घाइतेहरूलाई उपचारका लागि कनकाई अस्पताल, सुरुङ्गा लगिएकोमा चिकित्सकले बाबु(छोरी दुवैलाई मृत घोषित गरेका थिए ।
दुर्घटनामा परि मोटरसाइकलमा सवार मृतक समिरकी आमा ४५ वर्षीया नुरेश सादेवी गम्भीर घाइते भएकी छिन् । उनलाई थप उपचारका लागि बिर्तामोडस्थित बीएण्डसी अस्पताल पठाइएको छ ।
प्रहरीले दुर्घटनामा संलग्न ट्रयाक्टर, मोटरसाइकल र ट्रयाक्टर चालक कनकाई नगरपालिका–५ निवासी ४६ वर्षीय चक्रबहादुर तामाङलाई नियन्त्रणमा लिएको छ । घटनाबारे थप अनुसन्धान भइरहेको जिल्ला प्रहरी कार्यालय झापाले जनाएको छ ।
