सुनसरी,९ असार । सुनसरीको बर्जु गाउँपालिका–६ नरह चोक नजिक राजमार्गमा भएको सवारी दुर्घटनामा नेपाल प्रहरीका वरिष्ठ सईको मृत्यु भएको छ।
सुनसरी प्रहरीका सूचना अधिकारी डीएसपी चन्द्रबहादुर खड्काका अनुसार मंगलबार दिउँसो करिब १२ बजे विराटनगरबाट बर्जु गाउँपालिका–६ चिमडीतर्फ जाँदै गरेको प्र १–०२–००२ च ६२५२ नम्बरको ईभी कारले विपरीत दिशाबाट आउँदै गरेको प्र १–०१–००३ प २६१२ नम्बरको मोटरसाइकललाई ठक्कर दिएको थियो।
दुर्घटनामा सप्तरीको विष्णुपुर गाउँपालिका–१ घर भएका करिब ५० वर्षीय नेपाल प्रहरीका वरिष्ठ सई लालकुमार यादव गम्भीर घाइते भएका थिए।
घाइते यादवलाई तत्काल उपचारका लागि विराटनगरस्थित विराट नर्सिङ होम लगिएको थियो। तर उपचारकै क्रममा दिउँसो ४ बजेर १६ मिनेटमा उनको मृत्यु भएको प्रहरीले जनाएको छ।
घटनाबारे थप अनुसन्धान भइरहेको प्रहरीले जनाएको छ।
