सुनसरी, ११ साउन । सुनसरीको देवानगञ्ज गाउँपालिका–३ कप्तानगञ्ज (नयाँ हटिया) क्षेत्रमा दुई समुदायबीच हिंसात्मक झडप भएपछि स्थिति तनावग्रस्त बनेको छ। स्थिति नियन्त्रणमा लिन प्रहरीले चलाएको गोली लागेर एक युवकको मृत्यु भएको छ भने सुरक्षाकर्मीसहित थप २४ जना घाइते भएका छन्।
प्रशासनले सम्भावित जोखिमलाई मध्यनजर गर्दै सुनसरीका ५ प्रमुख बजार क्षेत्रमा अनिश्चितकालीन कर्फ्यु जारी गरी नेपाली सेनासमेत परिचालन गरेको छ।
प्रहरीका अनुसार साउने सोमबारका अवसरमा साउन १० गते आइतबार राति साढे १० बजेतिर बोलबमका श्रद्धालुहरू सप्तकोशीबाट जल लिएर डिजे बजाउँदै कप्तानगञ्ज चोकतर्फ जाँदै थिए।
सोही क्रममा अर्को समुदायका व्यक्तिहरूले रातिको समयमा चर्को आवाजमा डिजे नबजाउन आग्रह गरेपछि विवाद सुरु भएको थियो। सामान्य भनाभन र ठेलाठेलबाट सुरु भएको विवादले उग्र रूप लिँदै दुवै पक्षबाट लाठी, बाँस, ढुंगा, चिर्पट र भालाजस्ता घरेलु हतियार प्रयोग गरी झडप भएको थियो।
झडपका क्रममा कप्तानगञ्ज बजारका घर, औषधालय (मेडिकल), सवारी साधन तथा सार्वजनिक संरचनामा तोडफोड र आगजनी गरिएको थियो।
