भक्तपुर ,१३ साउन । सडक डिभिजन कार्यालय भक्तपुरका इन्जिनियर शैलेन्द्र कुमार चौधरीविरुद्ध अख्तियार दुरुपयोग अनुसन्धान आयोगले गैरकानुनी सम्पत्ति आर्जन गरेको अभियोगमा विशेष अदालत काठमाडौंमा मुद्दा दायर गरेको छ।
पदीय मर्यादाविपरीत कार्य गरी गैरकानुनी सम्पत्ति आर्जन गरेको उजुरीका आधारमा अनुसन्धान गर्दा चौधरीको २ करोड २६ लाख १३ हजार १२३ रुपैयाँ ३६ पैसा बराबरको सम्पत्तिको स्रोत नखुलेको अख्तियारले जनाएको छ।
अख्तियारले चौधरी सेवामा प्रवेश गरेको २०६५ साल पुस ११ गतेदेखि २०८२ साल असार २९ गतेसम्मको अवधिलाई अनुसन्धानको आधार बनाएको थियो।
अनुसन्धानबाट चौधरी र उनको परिवारको वैध आम्दानी २ करोड ७२ लाख ५५ हजार ७६६ रुपैयाँ ६ पैसा देखिएको छ। यसमा तलब, जग्गा बिक्री, श्रीमतीको आम्दानी, बैंक कर्जा, घरबहाल, बैंक ब्याज, पेन्सन र कृषि आयलगायतका स्रोत समावेश छन्।
तर सोही अवधिमा उनीहरूको कुल खर्च तथा लगानी भने ४ करोड ९८ लाख ६८ हजार ८८९ रुपैयाँ ४२ पैसा पुगेको अख्तियारको दाबी छ।
अनुसन्धानका क्रममा जग्गा, घर, सवारी साधन, ट्र्याक्टर, सुन, फर्निचर, सेयर खरिद, छोराछोरीको पढाइ, बिमा शुल्क तथा बैंकिङ खर्चमा ठूलो रकम खर्च भएको देखिएको छ।
आम्दानी र खर्चको तुलना गर्दा २ करोड २६ लाख १३ हजार १२३ रुपैयाँ ३६ पैसा बराबरको सम्पत्तिको स्रोत नखुलेको अख्तियारको निष्कर्ष छ।
गैरकानुनी सम्पत्ति परिवारका सदस्यको नाममा समेत राखिएको भन्दै अख्तियारले इन्जिनियर चौधरी र उनकी श्रीमती अर्पना कुमारीलाई प्रतिवादी बनाएको छ। उनीहरूमाथि बिगो असुल गरी कानुनबमोजिम सजायको माग गर्दै आरोपपत्र दायर गरिएको अख्तियारले जनाएको छ।
