दमक, ५ भदौ । मोरङ जिल्ला खेलकुद विकास समितिले पूर्णता पाएको छ। इन्द्रकुमार योञ्जन तामाङ अध्यक्षमा चयन भएसँगै समितिले पूर्णता पाएको हो।
समितिको सदस्यमा उर्लाबारी निवासी ईश्वरलाल उदाससहित पाँच जना मनोनीत भएका छन्। मनोनीत सदस्यहरूको पद तथा गोपनीयताको शपथसमेत गराइएको छ। अन्य सदस्यमा मधुमल्लाका सुशान्त खड्का, पथरी शनिश्चरेकी भूमिकादेवी मगर र अनिता राई तथा रंगेलीका दिलीपकुमार डाँगी रहेका छन्।
भदौ ३ गते मंगलबार मनोनीत सबै सदस्यलाई शपथ गराइएको थियो। समितिको सदस्यमा मनोनीत उदास बडी बिल्डिङ खेलमा लामो समयदेखि सक्रिय छन्। उनले राष्ट्रिय तथा अन्तर्राष्ट्रिय निर्णायकका रूपमा समेत जिम्मेवारी निर्वाह गर्दै विभिन्न प्रतियोगिता सम्पन्न गराइसकेका छन्।
उर्लाबारीमा २०५८ सालदेखि ईश्वर मल्टी जिम एन्ड फिटनेस सेन्टर सञ्चालन गर्दै आएका उदासले उक्त केन्द्रमार्फत राष्ट्रिय तथा अन्तर्राष्ट्रिय स्तरका बडी बिल्डर उत्पादनमा समेत योगदान पुर्याउँदै आएका छन्। उनको प्रशिक्षणबाट तयार भएका खेलाडीहरूले विभिन्न राष्ट्रिय तथा अन्तर्राष्ट्रिय प्रतियोगितामा उत्कृष्ट प्रदर्शन गर्दै पदक तथा ट्रफी जितेका छन्।
उदासको प्रशिक्षणबाट तयार भएका राम बस्नेत, विकास धिमाल, रोशन धिमाल, नवीन लिम्बू, राज लिम्बू र ललित धिमाललगायत खेलाडीले विभिन्न स्तरका प्रतियोगिता जित्दै बडी बिल्डिङ क्षेत्रमा आफ्नो पहिचान बनाएका छन्।
वि.सं. २०३४ सालमा भोजपुरको टक्सारमा जन्मिएका उदास १३ वर्षको उमेरदेखि नै खेलकुद क्षेत्रमा सक्रिय भएका हुन्। लामो समयदेखि खेलकुद क्षेत्रमा सक्रिय रहँदै आएका उनलाई जिल्ला खेलकुद विकास समितिमा जिम्मेवारी दिइनुलाई खेल क्षेत्रको अनुभवलाई संस्थागत रूपमा उपयोग गर्ने अवसरका रूपमा हेरिएको छ।
