काठमाडौं,७ असोज । बिहीबारदेखि १२ असोजसम्म अत्यावश्यकबाहेक लामो दूरीको यात्रा नगर्न यातायात व्यवसायीले सर्वसाधारणलाई आग्रह गरेका छन्।
नेपाल राष्ट्रिय यातायात व्यवसायी महासंघले विज्ञप्ति जारी गर्दै बिहीबारदेखि रातिको समयमा यात्रा नगर्न समेत अनुरोध गरेको छ।
महासंघले यातायात सेवा सञ्चालन गर्नुअघि बाटोको अवस्था र मौसमको जानकारी अनिवार्य रूपमा लिएर मात्र यात्रा गर्न आफ्ना सदस्य तथा चालकलाई सचेत गराएको छ।
यसअघि राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि लगातार वर्षाका कारण बाढी, पहिरो र सडक अवरोधको जोखिम बढ्न सक्ने भन्दै रातिको तथा लामो दूरीको यात्रा नगर्न सरोकारवालालाई आग्रह गरेको थियो।
मौसममा आएको खराबीका कारण सडकमा जोखिम बढ्न सक्ने भएकाले सुरक्षित यात्रा र सावधानी अपनाउन महासंघले सबैमा अपिल गरेको छ।
