आजदेखि सुरु भयो सोह्र श्राद्ध अर्थात् पितृ पक्ष। तर यो समयमा के गर्ने, किन गर्ने र के खान मिल्छ?

आश्विन कृष्ण प्रतिपदादेखि सुरु हुने सोह्र श्राद्धमा दिवंगत पितृको सम्झनामा तर्पण, सिदादान र पिण्डदान गरिन्छ। हिन्दू धार्मिक परम्पराअनुसार पितृप्रति श्रद्धा र आफ्नो दायित्व पूरा गर्ने उद्देश्यले यो कर्म गरिन्छ।
 के गर्ने?
आफ्नो पितृको मृत्यु भएको तिथिमा श्राद्ध गर्ने, तर्पण दिने, पिण्डदान गर्ने र ब्राह्मणलाई भोजन तथा सिदा दान गर्ने परम्परा छ। श्राद्ध सकेपछि परिवार तथा आफन्तलाई भोजन गराउने चलन पनि छ।
कुन समयमा गर्ने?
श्राद्ध अपराह्न समयमा गर्नु शास्त्रसम्मत मानिन्छ। बिहानै हतारमा श्राद्ध गर्नुभन्दा सम्बन्धित तिथिको नियम र स्थानीय परम्परा हेर्नुपर्छ।
के खान मिल्छ?
श्राद्धको दिन सामान्यतः सात्त्विक र शुद्ध भोजन खाने परम्परा छ। भात, दाल, तरकारी, साग, फलफूल, दूध तथा घिउबाट बनेका परिकार खान सकिन्छ। धेरै परिवारमा खीर, तरकारी, पुरी÷रोटी र विभिन्न सात्त्विक परिकार बनाउने चलन छ।
के नखाने?
परम्पराअनुसार श्राद्धमा मासु, माछा, अण्डा, मदिरा, लसुन–प्याज तथा अत्यधिक मसला नखाने चलन छ। तर खानपानका नियम समुदाय, परिवार र परम्पराअनुसार फरक हुन सक्छन्।

धार्मिक मान्यतामा यो समय पितृलाई सम्झने, उनीप्रति श्रद्धा व्यक्त गर्ने र परिवारका नयाँ पुस्तालाई आफ्नो संस्कार तथा परम्परासँग जोड्ने समय पनि हो।