बिर्तामोड, असोज ११ । झापाको बिर्तामोडमा कानुनी रूपमा प्रतिबन्धित नेटवर्किङ व्यवसाय र अवैध चिठ्ठाका नाममा हजारौँ सर्वसाधारण ठगिने क्रम तीव्र बनेको छ। एनके, ब्राभो, अजम्बरी, युएलसी लगायत दर्जनौँ कम्पनीहरूले कार, मोटरसाइकल र आकर्षक उपहारको प्रलोभन देखाएर महिना-महिनामा रकम असुलिरहेका छन्।अनुसन्धानका क्रममा यी कम्पनीहरूले नक्कली सदस्य खडा गरी पुरस्कार कम्पनीमै राख्ने गरेको र राजस्वको नाममा २५ प्रतिशतसम्म रकम काटेर सरकारी खातामा दाखिला नगरी ठगी गरेको पाइएको छ।
एनके प्युरिफायरबाट ठगिएका पीडितहरू इलाका प्रहरी कार्यालय पुगेपछि अन्य ठगी प्रकरण पनि बाहिरिन थालेका छन्। केही साताअघि ग्लोबल ओरियन्सबाट ४१ जना पक्राउ परे पनि पहुँच र दबाबका कारण मुख्य गिरोहमाथि कडा कारबाही हुन सकेको छैन। दुई दशकअघि ठूलो विवाद निम्त्याएको अवैध चिठ्ठा धन्दा प्रशासनको बेवास्ताका कारण बिर्तामोडमा पुनः फस्टाएको हो।
