झापा, १९ असोज । झापाको बिर्तामोड ८ मा निर्माण भएको भेलागुडी विश्रान्तिघाट देउनिया संचालनमा आएको छ । सो विश्रान्तिघाटमा पहिलो पटक बिर्तामोड ८ की ६२ वर्षीया कमलादेवी उप्रेती थापाको अन्त्येष्टि गरिएको हो । भेलागुडी वननजिक देउनिया खोलामा करिव ४० लाख रुपैयाँको लागतमा विश्रान्तिघाट निर्माण गरिएको छ । घाट निर्माणका लागि कोशी प्रदेश सरकारबाट ८ लाख र बिर्तामोड ८ नं वडा कार्यालयबाट १० लाख बजेट बिनियोजन भएको थियो ।
त्यस्तै पुराण संकलनबाट ९ लाख ३८ हजार रुपैयाँ संकलन भएको थियो । अन्य रकम विभिन्न दाताहरुले सहयोग गरेका थिए ।विश्रान्तिघाट बनेको स्थानमा सिंचाई डिभिजन कार्यालयबाट २५ लाखको लागतमा तटबन्ध गरिएको छ भने जनताको तटबन्ध कार्यालयले पनि तटबन्धकै लागि २१ लाख रुपैयाँ विनियोजन गरेको भेलागुडी विश्रान्तिघाट निर्माण समिति देउनियाका सचिव मदन अधिकारीले बताउनु भयो । विश्रान्तिघाट आसपासमा जनश्रमदानबाट आकर्षक पार्क निर्माण गरिएको छ । फूल फुल्न लागेको सो पार्कको सरसफाई र गोडमेलका लागि एक सातादेखि श्रमदान चल्दै आएको बिर्तामोड ८ का वडाध्यक्ष अजय कार्कीले जानकारी दिनु भयो ।
