काठमाडौँ ,२५ असोज । गोरखाको बुढीगण्डकीमा आएको बाढीका कारण चुमनुब्री गाउँपालिका वडा नम्बर–६ स्थित चुन्तेत घर भएका ५ जना सम्पर्क विहीन भएका छन् । भेडी गोठमा बस्दै आएका ५ जनाको पहिचान खुलेको जिल्ला प्रहरी कार्यालय गोरखाले जनाएको छ । उनीहरू सिरिङ्गे हिमालको फेदीमा रहेको भेडी गोठमा बस्दै आएका थिए ।
प्रहरीका अनुसार पहिरोले उइनगुलुङ खोलाको बहाव थुनिएपछि ड्याम फुटेर बुढीगण्डकीमा मिसिएको थियो । भेडीगोठबाट सम्पर्कविहीन हुनेहरूमा ६५ वर्षीय सोनाम लामा, ५९ वर्षीया मोम्मो अजि लामा, ६६ वर्षीया सोम भुटी लामा, ७३ वर्षीय कर्मा लामा र ४१ वर्षीय पोमा दोर्जे लामा छन् । चुमनुब्री गाउँपालिका वडा नम्बर–६ स्थित लोक्पा र चुम्लिङस्थित सिरिङ्गे हिमालको फेदीमा प्रहरी पुगेको छ । उनीहरूको खोजी कार्य भइरहेको जिल्ला प्रहरी कार्यालय गोरखाले जनाएको छ ।
