सुनसरी ,२६ असोज। दसैँ नजिकिएसँगै सुनसरीको इनरुवा–३ स्थित सोमबारे हाटमा खसीबोका किन्नेहरूको ठुलो भीड लागेको छ। दसैँको घटस्थापनाको भोलिपल्ट आज सोमबार जिल्लाका विभिन्न पालिकाबाट आएका सर्वसाधारण खसीबोका खरिद गर्न हाट पुगेका हुन्। हाटमा बिक्रीका लागि ल्याइएका साना पाठापाठीको मूल्य दुई–तीन हजार रुपैयाँदेखि ठुला खसीबोकाको मूल्य ५० हजार रुपैयाँसम्म तोकिएको छ। दसैँका लागि आवश्यक खसीबोका खरिद गर्न सर्वसाधारण बिहानैदेखि हाटमा पुग्दा बजारमा निकै चहलपहल बढेको छ।
नेपाली समाजमा दसैँका अवसरमा मासु खाने प्रचलन रहेकाले यो समयमा खसीबोकाको माग उच्च हुने गर्छ। दसैँको महाअष्टमी तथा महानवमीका दिन नवदुर्गा भवानीलाई खसीबोकाको बलि चढाउने धार्मिक परम्परासमेत रहेको छ।यही परम्परा र पारिवारिक जमघटका लागि मासुको जोहो गर्न सर्वसाधारण दसैँअघि नै खसीबोका खरिदमा जुटेका हुन्।
