सुनसरी,२८ असोज। सुनसरीको देवानगन्ज गाउँपालिकाका दुई छुट्टाछुट्टै स्थानबाट प्रहरीले ५७ किलो गाँजा बरामद गरेको छ। गाँजा ओसारपसारमा संलग्न व्यक्तिहरू भने प्रहरीलाई देखेलगत्तै फरार भएका छन्।जिल्ला प्रहरी कार्यालय सुनसरीका सूचना अधिकारी डीएसपी चन्द्रबहादुर खड्काका अनुसार देवानगन्ज–४ स्थित मेहता टोलबाट ५१ किलो र वडा नम्बर ६ को रासी–साहेवगन्ज भित्री सडकखण्डबाट ६ किलो गाँजा बरामद गरिएको हो।
इलाका प्रहरी कार्यालय देवानगन्ज र प्रहरी चौकी कप्तानगन्जको संयुक्त टोलीले मंगलबार राति साढे ८ बजे मेहता टोलमा चेकजाँच थालेको थियो। सो क्रममा भारततर्फ जाँदै गरेको बीआर ५० एएच १९१३ नम्बरको भारतीय मोटरसाइकल रोक्न खोज्दा चालक सवारी छाडेर भागेका थिए। उक्त मोटरसाइकल जाँच गर्दा कालो प्लास्टिकमा बेरेर राखिएको ५१ किलो गाँजा फेला परेको थियो।
त्यसको १५ मिनेटपछि देवानगन्ज–६ स्थित रासी–साहेवगन्ज सडकखण्डमा गस्तीमा रहेको प्रहरी टोलीलाई देखेर नम्बर नखुलेको अर्को मोटरसाइकलमा सवार व्यक्ति पहेँलो झोला फालेर फरार भएका थिए। प्रहरीले सो झोलाबाट ६ किलो गाँजा बरामद गरेको छ।बरामद गाँजा र भारतीय नम्बरको मोटरसाइकल इलाका प्रहरी कार्यालय देवानगन्जमा राखेर अनुसन्धान अघि बढाइएको छ। फरार व्यक्तिहरूको खोजी कार्य तीव्र पारिएको प्रहरीले जनाएको छ।
