झापा, ९ कात्तिक । झापामा धान पाक्ने समय नजिकिएसँगै किसानमा जङ्गली हात्तीबाट बाली जोगाउने चिन्ता बढेको छ। खेतबारीमा लगाएको धान जोगाउन रातभर जाग्राम बस्नुपर्ने अवस्थाका बीच हात्तीको आक्रमणबाट मानवीय क्षति हुन नदिन सशस्त्र प्रहरीले प्रभावित क्षेत्रमा जनचेतनामूलक अभियान र सुरक्षा निगरानी बढाएको छ। चाडपर्वका बेला मानिसको चहलपहल बढ्ने र बिहान–बेलुका तथा रातको समयमा जङ्गली हात्तीसँग जम्काभेट हुने जोखिम उच्च हुने भएकाले बस्तीहरूमा ‘माइकिङ’मार्फत सचेतना फैलाउन थालिएको छ। सशस्त्र प्रहरीले अँध्यारो समयमा अत्यावश्यक कामबाहेक बाहिर ननिस्कन र सतर्कता अपनाउन स्थानीयलाई आग्रह गरेको छ।
सशस्त्र प्रहरी बल नेपाल नं २ गण झापाका प्रमुख तथा सशस्त्र प्रहरी उपरीक्षक (एसपी) सचिन कर्माचार्यले मानवीय तथा भौतिक क्षति न्यूनीकरण गर्न सुरक्षा सतर्कतासँगै जनचेतनालाई प्राथमिकतामा राखिएको बताउनु भयो। “बाली जोगाउने प्रयास गर्दा किसानले आफ्नो सुरक्षालाई पहिलो प्राथमिकता दिनुपर्छ,” उहाँले भन्नु भयो, “हात्ती देखिएमा नजिक जाने, जिस्क्याउने, फोटो–भिडियो खिच्ने वा लखेट्ने काम नगरी तत्काल सुरक्षित स्थानमा बस्नुपर्छ।”उहाँका अनुसार हात्ती प्रभावित क्षेत्रमा सशस्त्र प्रहरीको मोबाइल टोली र पैदल गस्ती परिचालन गरिएको छ। स्थानीय तह र सरोकारवाला निकायसँग समन्वय गरी जोखिम न्यूनीकरणका प्रयास भइरहेका छन्।
सशस्त्र प्रहरीले घर, गोठ तथा आँगन वरपर हात्तीलाई आकर्षित गर्ने खानेकुरा नराख्न, घर वरिपरि पर्याप्त उज्यालो राख्न र झाडी सफा गर्न अपिल गरेको छ। साथै, बालबालिका तथा वृद्धवृद्धाको विशेष ख्याल गर्न आग्रह गरिएको छ। झापाको मेचीनगर (बाहुण्डाँगी), बुद्धशान्ति, हल्दिबारी (जलथल), अर्जुनधारा (चुरे क्षेत्र) तथा दमक र शिवसताक्षीका विभिन्न बस्ती लामो समयदेखि जङ्गली हात्तीको समस्याबाट प्रभावित रहँदै आएका छन्।
