काठमाडौं,१७ कार्तीक। प्रसिद्ध धार्मिक तथा ऐतिहासिक बुढानीलकण्ठ मन्दिर क्षेत्र आसपास सार्वजनिक जग्गा मिचेर बनाइएका अवैध संरचना हटाउन सम्बन्धित निकायले निर्देशन दिएको छ। तोकिएको समयभित्र संरचना नहटाए आगामी कात्तिक १८ गतेदेखि डोजर चलाउने तयारी गरिएको छ।
सार्वजनिक तथा गुठीको जग्गा अतिक्रमण गरी बनाइएका घरटहरा, स्थायी–अस्थायी पसल र अवैध संरचना तत्काल आफैं हटाउन सम्बन्धित व्यक्ति तथा व्यवसायीहरूलाई स्पष्ट निर्देशन दिइएको हो। मन्दिर क्षेत्रको सौन्दर्यीकरण, सार्वजनिक सम्पत्तिको संरक्षण र दर्शनार्थीहरूको सहज आवागमनलाई ध्यानमा राख्दै यो कदम चालिएको जनाइएको छ।
अतिक्रमणका कारण मन्दिर परिसर अस्तव्यस्त बनेको र ऐतिहासिक गरिमामा असर परेकाले संरचना हटाउन लागिएको सम्बन्धित पक्षको भनाइ छ। डोजर सञ्चालनका क्रममा उत्पन्न हुन सक्ने अवरोध वा विवादलाई मध्यनजर गर्दै स्थानीय प्रशासन तथा सुरक्षा निकायसँग आवश्यक समन्वय गरी सुरक्षा प्रबन्ध मिलाइएको छ। प्रशासनले निर्धारित समयसीमाभित्र आफ्ना संरचना स्वेच्छाले हटाएर सम्पदा संरक्षण अभियानमा सहयोग पुर्याउन सबैलाई आग्रह गरेको छ।
