दमक, २ भदौ / दमक ९ नम्बर वडाका बासिन्दाले वडामा युवा वडाध्यक्ष भएका कारण विकासमा केही प्रगति भएको उल्लेख गर्दै भौतिक विकासलाई अझ व्यवस्थित बनाउनु पर्नेमा जोड दिएका छन् ।
उज्यालो खबरले सञ्चालन गरेको ‘जनतासँग जनप्रतिनिधि’ कार्यक्रममा वडावासीले त्यसखाले सवाल अघि बढाएका हुन् ।
वडाको सुशासन र जनप्रतिनिधिमा जवाफदेहिता बढाउन मद्यत गर्ने उद्धेश्यले वडावासीले उडाएका सवाल, प्रश्न तथा सुझावलाई छायांकन गरी वडाध्यक्षसम्म पुर्याएर जवाफ प्रदान गर्ने सो कार्यक्रम अन्तर्गत ९ नम्बर वडाध्यक्ष कुवेरप्रसाद भट्टराईसँग कुराकानी गरिएको छ । यस क्रममा उहाँले वडाको बजेटको सीमामा रहेर वडावासीको सुझावमा आधारित भइ वडाको समग्र विकासलाई आवश्यकताका आधारमा प्राथमिकीकरण गरी व्यवस्थित गर्दै लाने कुरामा आफु कटिबद्ध रहेको जवाफ दिनुभयो ।
अन्नपूणर् टोलकी अनुता तामाङले आफ्नो टोलमा पानी पर्दा बाटोमा हिलो हुने गरेको, रामप्रसाद भण्डारीले सडक वत्तीमा समस्या भइ दक्षिणी क्षेत्र हेंलामा परेको गुनासो राख्नुभयो ।
डा. नेत्र भण्डारीले जनप्रतिनिधिको इच्छा अनुसार मात्र काम हुने परिपाटी रहेको टिप्पणी गर्दै वडावासीको आकांक्षा बढी मात्रामा बुझ्न सुझाव दिनुभयो । ऋषिराज आचार्यले चियावगानको बस्तीमा अझै पनि खानेपानीको अभाव भइरहेको कुरा उठाउनु भयो ।
बनेका सडकको सौन्दर्यकरण नभएको जनाउँदै सौन्दर्यकरणमा ध्यान दिन हरि सुवेदीको सुझाव छ । नगेन्द्र घोर्साइले वडाका दुई वटा सडकमा हालसम्म काम हुननसकेकोमा दुःख व्यक्त गर्नुभयो ।
युवराज कोइरालाले नयाँ र सिर्जनशील काम खासै हुन नसेकेको उल्लेख गर्दै सामाजिक सुरक्षा भत्ताको नवीकरण गर्न ठाउँ ठाउँमा सञ्चालित शिविरका बारेमा सम्बन्धित सबैले थाहा नपाएको गुनासो राख्नुभयो । शान्तिराम भट्टराईले साविक दमक १४ मा योजना बढी पारेर साविक १५ लाई उपेक्षा गरिएको बुझाई राख्नुभयो । नगरस्तरीय योजनाको वडामा अभाव रहेको पनि बताउनु भयो ।
बाबुराम श्रेष्ठले टोल विकास संस्थासँग वडाले समन्वय गर्नुपर्ने सुझाव राख्नु भयो । वडामा टोल विकास संस्थाको भूमिका देखिने गरी काम गर्न र संस्थाको सशक्तिकरणमा ध्यान दिनुपर्ने कुरा राख्नुभयो ।
