दमक, १६ असोज /
दमक ७ की विष्णुमाया दाहालले अर्गानिक धुप बाट्ने सीप सिक्नु भयो । यत्तिकै घरमा बस्नु भएकी दाहालले धुप बनाउन सिकेपछि अव घरै बसेर पनि आम्दानी गर्न सकिने रहेछ भन्ने विश्वास लागेको छ ।
यस्तै, रेनुका ढकाल पनि बिहान बेलुकाको घरको काम सकेर दिउँसो फुर्सद नै बस्नु हुन्थ्यो । तर अहिले उहाँले पनि अर्गानिक धुप बनाउने सीप सिक्नु भयो । र, यही सीपबाट घरै बसी बसी दुई चार पैसा कमाइन्छ र आफ्नो खर्च उठाइन्छ भन्ने लागेको छ ।
महिलाहरुलाई आत्मनिर्भर बनाउनु पर्छ भनेर राज्यका बिभिन्न तह र निकायले कार्यक्रम गरिनै रहेका हुन्छन् । तर यो कार्यक्रम राज्यको कुनै निकायबाट वा राज्यबाट लिइएको अनुदानबाट पनि गरिएको होइन ।
तिज कार्यक्रम भड्किलो नबनाऔं भन्दै त्यो बेला तिजलाई सीपमा रुपान्तरण गर्न अखिल नेपाल महिला संघ दमक ७ ले संघका अगुवाहरुबाट यथासक्य रकम संकलन गरी वडामा महिलाका लागि अर्गानिक धुप बनाउने तालिमको चाँजो मिलायो ।
महिलाहरुका लागि रोजगार वा स्वरोजगारमा लाग्न प्रोत्साहनको कार्यक्रम गर्ने भन्ने सोचलाई पूणर्ता दिन यो कार्यक्रम आयोजना गरिएको अनेम संघ वडा नम्बर ७ की अध्यक्ष इश्वरा खनाल अधिकारीले औचित्य दर्शाउनु भयो ।
बुधबार आयोजना गरिएको समापन कार्यक्रमको प्रमुख अतिथि अनेम संघ कोशी प्रदेश सचिवालय सदस्य दुर्गा खनाल काफ्लेले यसखाले कार्यक्रमबाट अब महिलाहरु आर्थिक रुपान्तरणमा पनि जोडिने अभियानमा लागेको प्रतिक्रिया दिनुभयो । महिला जवसम्म आर्थिक रुपमा सक्षम बन्दिनन् तवसम्म यहाँ समृद्धि सम्भव छैन भन्ने बुझाउन पनि यो कार्यक्रम एक महत्वपूणर् उदाहरण बन्ने उहाँको भनाई छ ।
तीन दिनसम्म चलेको धुप बनाउने तालिममा खेमकुमारी संग्रौला ओलीले सहजीकरण गर्नु भएको थियो ।
समापन कार्यक्रममा नेकपा एमाले नगर अध्यक्ष राम पौडेलसहित नगर तथा वडागत नेताहरुको उल्लेख्य उपस्थिती रहेको थियो ।
