दमक, १ पुस / इसाई धर्मावलम्बीहरुले ख्रीष्टमस पर्वका अवसरमा पुस २ गते झापाको दमकमा सम्मानसहितको कार्यक्रम हुने भएको छ ।
ख्रीष्टमस समारोहमा येशु ख्रीष्ट र बाइबलका धर्मदर्शनका सन्देशसहितको प्रवचन, मनोरञ्जनात्मक गीतसंगीत, नृत्य र शुभकामना आदानप्रदान कार्यक्रम गरिने आयोजक दमक नगर इसाई समाजले जनाएको छ । जसमा वरिष्ठ लोक गायक सिताराम ताजपुरियालाई नगदसहित दोसल्ला ओढाएर सम्मान गरिने भएको छ ।
दमक नगर उपप्रमुख रेगिना भट्टराई प्रसाईंको प्रमुख आतिथ्यतामा गोर्खा डिपार्टमेन्ट अगाडि ख्रीष्टमस मनाइने कार्यक्रम संयोजक पाष्टर आकाश थुलुङ राईले जानकारी दिनु भयो । २९ वर्षअघि दमकमा इसाई धर्मावलम्बीहरुले स्थापना गरेको दमक नगर इसाई समाजले हालसम्म सामाजिक सेवा र सामाजिक रुपान्तरणममा रचनात्मक कार्यहरु सञ्चालन गर्दै आइरहेको पाष्टर थुलुङले उल्लेख गर्नुभएको छ ।
सो समारोहलाई मनोरञ्जन बनाउन स्थानीय चर्चका कलाकारले गीतसंगीत र नृत्य प्रस्तुत गरिने भएको छ । त्यस्तैं, दमकका ३६ वटा चर्चबाट आ–आफ्नो जातीय र साँस्कृतिक भेषभूषामा सजिएर आउने कार्यक्रम रहेको पाष्टर थुलु्रङले बताउनु भयो ।
ख्रीष्टमसलाई लक्षित गरेर पुस ४ गते दमक ५ नारायणगोपाल टोलमा दमक थुलुङ डेन्टल क्लिनिकसँगको सहकार्यमा एक दिने निःशुल्क दन्त शिविर गर्नेभएको छ ।
ख्रीष्टमसकै अवसर पारेर यसअघि फुटसल प्रतियोगिताकासाथै दमकको चारवटा ग्रामिण क्षेत्रका सामदायिक विद्यालयमा अध्ययनरत विद्यार्थीहरुलाई न्यानोकपडा, खेलकुद सामग्रीहरु वितरण गरिएको समाजका दमक नगर पूर्व अध्यक्ष एवम् अन्तर धार्मिक शान्ति सञ्जाल झापाका अध्यक्ष पास्टर राजकुमार नाछिरिङ राईले जनाउनु भयो ।
