दमक, १८ साउन / जहाँ एकजना महिला आफ्नो भनिएको जग्गामा एकाएक नगरपालिकाले डोजर लगाएर बाटो बनाउन लागेको भन्दै त्यसको प्रतिकार गर्न डोजर माथीनै चढेर हारगुहार मागिरहनु भएको छ ।
यसपछि यहाँ नगर प्रहरीले यी महिलालाई सो डोजरबाट हटाएको दृष्य देखिन्छ । यसपछि ती महिलाका श्रीमान हातपात नगर्नुस है भन्दै फेरि डोजरमै चढेको दृष्य देखिन्छ । सँगै उहाँकी श्रीमतीलाई प्रहरीले भूँईमा लछार पछार पारेको दृष्य पनि यही भिडियोमा देख्न सकिन्छ ।
यो हो दमक नगरपालिका वडा नम्बर ७ स्थित गोसलाइनको दक्षिणतर्फको स्थल । यहाँ प्रविण चाम्लिङले १५ वर्ष अघि खरिद गरेर भोग्दै आउनु भएको जमिनमा नगरपालिकाले बाटो निकाल्न आँटेपछिको विवाद हो । दुई कट्ठा जमिनमा चाम्लिङले कुनैपनि बाली नलगाई जमिन बाँझै भएपछि त्यसैबेलादेखि यहाँका स्थानीयवासी हिँड्दैजाँदा यहाँ गोरेटो बाटो बन्नपुगेको थियो । यही गोरेटो बाटोलाई नक्सामै सडक बनाइ नयाँ सडक निकालिदिन यहाँका केही स्थानीयबासीले नगरपालिकामा निवेदन आलेपछि सो निवेदनका आधारमा नगरपालिकाले यहाँ बाटो रहेको भन्दै बाटो निकाल्न आएको हो ।
तर चाम्लिङ नगरपालिकाको यो निणर्य र फैसालामा चित्त नबुझेको भन्दै चन्द्रगढीस्थित पुनरावेदन अदालतमा गएर नगरपालिका विरुद्धमा रिट हाल्नु भएको छ । सो रिटबारेमा अहिलेसम्म अदालतले फैसला गरिसकेको छैन । तर मुद्धा विचाराधीन रहेकै अवस्थामा नगरपालिका यहाँ डोजर लिएर निजी जमिनमा बाटो बनाउन आएपछि प्रहरी, जनप्रतिनिधि र केही स्थानीयबीच घम्साघम्सी भएको हो । यही भिडमा चाम्लिङ भनिरहनु भएको छ ‘अदालतको आदेश छ ? बाटो निकाल्नु भनेको कागज छ ?’ भन्दै प्रशासन तथा नगरपालिकालाई प्रश्न गरिरहनु भएको छ ।
चाम्लिङको यो प्रश्नको कुनैपनि प्रवाह नगरी इलाका प्रहरी कार्यालयका प्रहरीहरु र नगर प्रहरीको टिमले नगरपालिकाका प्रमुख रामकुमार थापाको निर्देशन अनुसार यहाँ बाटो बनाउने काम रोकेन । बाटो निर्माण गर्न आवश्यक पर्ने सामग्री लिएरै आएको नगरपालिकाको टिमले बाटो निकालेरै गयो ।
अहिले यहाँ धान रोपिरहेको जग्गामा नगरपालिकाको टोली आएर सर्वसाधारण हिड्न मिल्नेगरिको बाटो निर्माण गर्यो । तर यहाँ विगतमा कत्रो बाटो थियो भन्ने समेत उजुरी पत्रमा उल्लेख नभएको र यहाँ बाटो थियो अरे भनेको भरमा नगरपालिकाले बल मिच्याई गरेर बाटो बनाएको भन्दै चाम्लिङले निरन्तर आक्रोश पोखिनै रहनु भयो ।
यही भिडदेखि केही अलग भएर नयाँ बाटो खुलाउन आउनु भएकी दमक नगरपालिकाकी उप प्रमुख रेगिना भट्टराईले यहाँ चलनचल्तीको २० फुटे बाटो रहेको साविकको नक्सामा समेत देखिएको र सो बाटोबाट झण्डै ३० वटा जति घर घडेरी असरग्रस्त भएकोले विधिपूर्वक सबै प्रकृया पुर्याएर सप्रमाणनै बाटो निकाल्न आएको प्रतिकृया दिनु भएको छ ।
तर नगरपालिकाले गरेको यो फैसला र निणर्यबाट आफु पीडित बनेको भन्दै चाम्लिङले २०८१ जेठ ३० गते झापा जिल्ला अदालतमा रिट दायर गर्नु भएको छ । उहाँलाई यही साउन २१ गते तारेखमा आउन भनेर अदालतले बोलाएको भएपनि त्यस अघिनै नगरपालिकाले यहाँ आएर आफ्नो जमिनबाट बाटो निकालेकोमा चाम्लिङले खेद प्रकट गर्नु भएको छ ।
यद्यपि यहाँ दमक नगरपालिकाले ढुंगा गिट्टी तत्काल हालेर २० फूटको बाटो भनें बनाएरै फर्केको छ । अव साउन २१ गतेको तारेख र जिल्ला अदालतले यो बाटो भत्काउन वा बाटोमै कायम गर्न, कस्तो आदेश दिन्छ त्यो भने हेर्न बाँकीनै छ ।
