दमक, २३ असोज
उहाँको नाम हो अर्जुन न्यौपाने । दमक ३ स्थित जनज्योति टोल उहाँको घर । आर्थिक रुपमा विपन्न उहाँको परिवारलाई अहिले दशंैमा मिठो खाने र राम्रो लगाउने भन्दा पनि छाक कसरी टार्ने भन्नेकै पिरलो छ । त्यही भएर दशैंको बेलामा वडा कार्यालयमा रासन सहितको राहत वितरण छ भन्ने सुनेर उहाँ ३ नम्बर वडा कार्यालयमा आइपुग्नु भयो ।
बाघखोर दमककी कोपिला पाण्डेको श्रीमान कमाउन भन्दै १५ दिन अघि बैदेशिक रोजगारमा जानु भएको छ । अर्काको केही खेत अँधिया गरेर जीविकोपार्जन गर्न धौ धौ भएपछि भर्खरै लाखौ ऋणपान गरेर श्रीमान विदेश जानुभएपनि अहिले आफ्ना लालाबालालाई कसरी चार्ड मनाउने भन्ने चिन्ताले चिन्तित कोपिलालाई वडाले दिएको रासनले राहत मिलेको प्रतिकृया दिनुभयो ।
दमक नगरपालिका वडा नं ३ का वडाध्यक्ष नवीन बरालले भुगोलको रुपमा यो वडा ठूलो र धेरै सुकुम्बासीका साथै आर्थिक विपन्न परिवार रहेकाले राहतका लागि छनोटमा पनि समय लागेको बताउनु भयो । तरपनि दशैंको बेलामा यसखाले राहत कार्यक्रमले विपन्नसँग हामी पनि छौ, विपन्नसँगै हामीपनि दशै मनाउँछौं भन्नेगरिको भावनाको विकास गराउन यो कार्यक्रम गरिएको बताउनु भयो ।
यसरी वडा-वडा तथा नगरमा समेत विपन्नहरुलाई राहत वितरण गरियो । दशैंलाई लक्षित गरेर गरिएको यो कार्यक्रम वडा नं ६ मा पनि गरियो । छुट भएकाहरुलाई बुधबार समेत सो वडाले रातह वितरण गरेको थियो । वडा तथा नगरमा समेत गरी यो पटक ३ सय भन्दा बढी विपन्न परिवारलाई राहत वितरण गरिएको छ । विभिन्न टोल विकास संस्थाको सिफारिस, वडाको प्रमाणित अनि नगरले बनाएको विपन्न पहिचान गर्ने समितिको स्विकृतीमा विपन्न परिवारलाई दशैंमा राहत वितरण गरिएको नगरकी उप-प्रमुख रेगिना भट्टराई प्रसाईंले जानकारी दिनुभयो ।
दमक नगरपालिकाको तथ्यांकमा अहिले ४ हजार २ सय परिवार विपन्न छन् । ती मध्ये १ हजार २ सय अति विपन्न रहेको नगरको तथ्यांकमा उल्लेख छ ।
नगर प्रमुख राम कुमार थापाका अनुसार अति विपन्न मध्ये पनि यो पटकको दशैंमा ३ सय परिवारलाई दशैं राहत दिइएको र बाँकीलाई फेरि चैत महिनातिर वितरण गरिने उहाँले जानकारी दिनुभयो । यो कार्यक्रममा यो वर्ष १५ लाख रुपैँया बजेट विनियोजन गरी काम गरिएको उहाँको भनाई छ ।
पहुँच भएकाहरुका लागि मात्रै सरकार छ भन्ने गलत भाष्यलाई चिर्न दमकका विपन्न परिवारलाई दशंैको मुखैमा वितरण गरिएको खाद्यान्नले विपन्नकालागि पनि सरकार छ है भन्ने अवस्था विकास गराएको छ । यसलाई निरन्तरता दिइदै भूँई मान्छेले समेत सरकार भएको अनुभूति हुनेगरिका रोजगारीसहितका अन्य प्रभावकारी काम गर्न पालिका सरकार अग्रसर हुन आवश्यक छ ।
